ភ្នំពេញ ៖ តារាចម្រៀង ហង្ស ឧត្ដមម៉ានី បើគិតមកទល់ពេលនេះវត្តមាន របស់លោកបានស្ងាត់សូន្យឈឹង ទាំងការចេញបទចម្រៀង ក៏ដូចជាឡើងឆាក ទូរទស្សន៍នានាផងដែរ ពោលគឺភាពស្ងប់ស្ងាត់ នេះប្រហែល មានរយៈពេលជិត ៣ឆ្នាំហើយ ដោយចាំថាវត្តមានចុងក្រោយ របស់លោកសម្រាប់ការចេញ បទចម្រៀងថ្មី និងឡើងឆាកតន្ត្រីគឺនាកំលុងឆ្នាំ ២០១៨ ។
ទាក់ទងនឹងការអវត្តមាន របស់លោក ហង្ស ឧត្ដមម៉ានី នេះផងដែរ ក៏មានមហាជន ជាច្រើនងឿងឆ្ងល់យ៉ាងខ្លាំងថា តើម្ចាស់បទ «វិប្បដិសារី» រូបនេះនៅតែជាតារាចម្រៀង នៅក្នុងផលិតកម្មសាន់ដេដដែល ឬចាកចេញ? ហើយខ្លះក៏សង្ស័យថា ទំនងជាលោក ហង្ស ឧត្ដមម៉ានី បានផ្អាកពីការងារជាតារាមច្រៀង ហើយទៅប្រកបមុខរបរផ្សេង ដែលកាក់កបជាងនេះ ព្រោះថា ចាប់តាំងពីលោកឈានជើងចូល ជាតារាចម្រៀងរបស់ផលិតកម្មសាន់ដេកាលណាមក ប្រជាប្រិយភាព របស់លោកចាប់ផ្ដើមធ្លាក់បន្តិចម្ដងៗ ។
បើក្រឡេកទៅ មើលគណនីហ្វេសប៊ុក របស់លោក ហង្ស ឧត្តមមុន្នី ក៏ពុំសូវជាបានប្រើញឹកញាប់នោះដែរ ។ ម្តងម្កាលលោកផុសរូប និង សកម្មភាពបច្ចុប្បន្ន នៃមុខជំនួញរបស់លោក ដែលពាក់ព័ន្ធនឹង ផ្នែកអចលនទ្រព្យ។
យ៉ាងណាមិញ លោក ហង្ស ឧត្តមម៉ានី មិនមែនទើបតែចាប់ផ្តើម លើវិស័យអចលនទ្រព្យ នៅពេលដែលលោកចាកចេញ ពីវិថីសិល្បៈនោះទេ តែគេចាំបានថា លោកបានចាប់ផ្តើមអាជីពនេះ តាំងពីនៅជាតារាចម្រៀង នៅឡើយមកម្ល៉េះ។ លើសពីនោះក្រៅពីអាជីព ផ្នែកលក់ដីឡូត៍នេះ លោក ហង្ស ឧត្តមមុន្នី ក៏មានបើក «តន្ត្រីសម័យ ហង្សឧត្ដមម៉ានី» ដែលទទួលរៀបចំកម្មវិធីជប់លៀង ផ្សេងៗទៀតផង ។
គួររំឮកថា ហង្ស ឧត្ដម ម៉ានី បោះ ជំហាន ប្រឡូក ចូល សិល្បៈ លើក ដំបូង ឆ្នាំ ២០០០ ក្នុង ផលិតកម្ម រស្មី ស្ទឹង សង្កែ។ បទ ចម្រៀង ផ្ទុះ ខ្លាំង ពេល នោះ គឺ បទ “ស្រក់ ឈាម មិន ស្រក់ ទឹក ភ្នែក”។ ក្រោយ ចេញ ពី រស្មី ស្ទឹង សង្កែ លោក បាន ចូល មក កាន់ ផលិតកម្ម U2 ហើយ ក៏ ផ្អាក ពី សិល្បៈ មួយ រយៈ ក្នុង ឆ្នាំ ២០០៧ ។
នៅ ក្នុង ឆ្នាំ ២០១០ តារា ចម្រៀង ល្បី ឈ្មោះរូបនេះ ចាប់ ផ្ដើមអាជីព ចម្រៀង វិញ ក្នុង ផលិតកម្ម សាន់ដេ។ ដោយបទចម្រៀងល្បីៗ របស់លោកនៅក្នុងផលិតកម្មមួយនេះ មានដូចជាបទ «វិប្បដិសារី», « ចង់បបួលអូនមកឈឺចាប់», « នៅក្បែរគេតែអារម្មណ៍នឹកអូន», «កង់អូនវិលដុំ» និងបទ «បាត់អូន ដូចបាត់មនុស្សមួយផែនដី» ជាដើម ៕
ដោយ៖ ម៉ានី
