កូរ៉េខាងត្បូង៖នេះបើតាមតុលាការស្រុក Uijeongbu បាននិយាយថា បុរសម្នាក់ដែលបានចូលផ្ទះរបស់តារាចម្រៀង និងតារាសម្ដែងជនជាតិកូរ៉េខាងត្បូង នាង NaNa ហើយគំរាមកំហែងនាងដោយអាវុធត្រូវបានកាត់ទោសឲ្យជាប់ពន្ធនាគារ ៧ ឆ្នាំនៅថ្ងៃអង្គារ
តុលាការបានអនុវត្តបទចោទប្រកាន់ ពីបទបង្ករបួសដល់រាងកាយបណ្តាលមកពីការប្លន់ ដែលមានចែងពីការពិន័យអប្បបរមាចំនួន ៧ ឆ្នាំ។ តុលាការបានបន្តថា ចុងចោទ បានចូលទៅក្នុងលំនៅដ្ឋានឯកជនមួយ នៅពេលយប់ដោយកាន់អាវុធ ជាពេលវេលាដែលមនុស្សគួរ តែមានអារម្មណ៍ស្រួលក្នុងផ្ទះរបស់ពួកគេ។
ការដាក់ទណ្ឌកម្មនេះ គិតគូរពីការរៀបរាប់របស់ជនរងគ្រោះអំពីការឈឺចាប់ខាងរាងកាយ និងផ្លូវចិត្តយ៉ាងធ្ងន់ធ្ងរ និងបំណងប្រាថ្នារបស់ពួកគេក្នុងការឃើញជនជាប់ចោទទទួលទោស ក៏ដូចជាការពិតថា អាវុធដែលជនជាប់ចោទកាន់ហាក់ដូចជាមិនមានបំណងបង្ករបួសស្នាមនោះទេ។
តុលាការបានកំណត់ថា ម្តាយរបស់នាង Nana បានបញ្ចុះបញ្ចូលជនល្មើសដែលមាននាមត្រកូល Kim ឲ្យដាក់អាវុធចុះមួយភ្លែត។ តារាចម្រៀងរូបនេះ ដែលក្រោយមកបានមកដល់កន្លែងកើតហេតុ បានរើសវាឡើង ហើយប្រើវាឆ្ពោះទៅរកជនល្មើស។
តុលាការបានបដិសេធការអះអាងរបស់ Kim ថា គាត់មិនបានកាន់អាវុធ នៅពេលគាត់ចូលទៅក្នុងលំនៅដ្ឋាន ហើយមិនមានបំណងប្លន់នោះទេ។ តុលាការបានបន្ថែមថា ជនរងគ្រោះបានផ្តល់សក្ខីកម្មលម្អិត និងស៊ីសង្វាក់គ្នាទាក់ទងនឹងការកាន់កាប់អាវុធរបស់ចុងចោទ។ មានកំណត់ត្រាបង្ហាញថា លោក Kim បានស្វែងរកព័ត៌មានអំពីការពិន័យទាក់ទងនឹងការកាន់កាប់អាវុធមុនពេលប្រគល់ឧបករណ៍ចល័តរបស់គាត់ទៅឲ្យប៉ូលិស៕
