ក្រោយសៀម បានវាយលុកចូលបន្ទាយលង្វែក បាននៅគ្រិស្ដសករាជ១៥៩៣ នគរនេះបានកាន់កាប់បន្ទាយលង្វែក បានប្រហែលមួយឆ្នាំប៉ុណ្ណោះ។ ក្រោមការដឹកនាំ របស់ព្រះបាទរាមាជើងព្រៃ ខ្មែរក៏វាយដណ្ដើម បន្ទាយលង្វែកមកវិញ បាននៅឆ្នាំ១៥៩៤។
ព្រះចៅនរេនសូរស្ដេចសៀម ក្រោយពីបានជ័យជម្នះលើខ្មែរហើយ ក៏ទ្រង់តែងតាំងមហាមន្ត្រីសៀម និងពលទាហាន ២ពាន់នាក់ អោយនៅក្នុងស្រុកឧដុង្គ ដើម្បីត្រួតត្រាកិច្ចការប្រទេសខ្មែរ ។ ពេលនោះ សម្ដេចព្រះរាមាធិបតីអុង នៅខេត្តជើងព្រៃ ដែលអ្នកផងនិយមហៅថា ព្រះបាទរាមាជើងព្រៃ ជាព្រះញាតិរបស់ព្រះមហិន្ទរាជាព្រះសត្ថា ទ្រង់បានកេណ្ឌទ័ពទៅវាយកម្ចាត់ពួកសៀម ឲ្យដកទ័ពរត់ត្រឡប់ទៅស្រុកវិញអស់ក្នុងឆ្នាំ១៥៩៤ នៃគ្រិស្ដសករាជ។ បន្ទាប់មក ព្រះអង្គក៏ទ្រង់ឡើងគ្រងរាជ្យ នៅរាជធានីស្រីសន្ធរ ដោយមានព្រះនាមក្នុងរាជ្យថា ព្រះរាមាធិបតីបរមរាជាធិរាជ ។
យោងតាមឯកសារមហាបុរសខ្មែរ ព្រះរាមាធិបតីព្រះរាមជើងព្រៃ ទ្រង់គ្រងរាជ្យបានតែបីឆ្នាំប៉ុណ្ណោះ ក្នុងខែមករា ឆ្នាំ១៥៩៦ លោក វេ៉ឡូសូ ជាប្អូនថ្លៃព្រះសត្ថា និងបក្ខពួក បានត្រលប់មកខ្មែរវិញ។ លុះដឹងថា ព្រះនគរបែកនឹងសៀមហើយ ហើយព្រះរាមាជើងព្រៃ ជ្រែករាជសម្បត្តិព្រះអង្គ ទាល់តែព្រះបរមបពិត្រ ទ្រង់សុគតនៅឯខេត្តស្ទឹងត្រែងទៀត ម្សៀរល្វីវ៉េឡូហ្សូ ក៏ក្រេវក្រោធពន់ប្រមាណណាស់ គិតនឹងធ្វើគតព្រះរាមជើងព្រៃ។ សម្ដេចព្រះរាមាធិបតីគ្រងរាជ្យ ទ្រង់ក៏បានជ្រាបនូវគំនិតនេះដែរ ទ្រង់ក៏គិតនឹងឧកញ៉ាក្រឡាហោម ឧកញ៉ាចក្រីសេនាសឹកព្រះអង្គ នឹងរកកលឧបាយចាប់ម្សៀរ ល្វីវ៉េឡូហ្សូនោះឱ្យបាន ។
ក្នុងគ្រាដែលទ្រង់ជំនុំគិតការណ៍ នោះមានស្រីពីរនាក់ឈ្មោះនាងម៉ៅ ១ នាងម៉ា១ ដែលត្រូវជាកូនចៅជាទីប្រោសប្រាណ អំពីសម្ដេចព្រះមហាមហិន្ទរាជា មកស្ដាប់ ឮ ហើយក៏ លបទៅប្រាប់ ម្សៀរល្វីវ៉េឡូហ្សូ ឱ្យបានដឹងអំពីស្ដេចជំនុំកិច្ចការនោះ ។ ម្សៀរល្វីវ៉េឡូហ្សូ បានដឹងហើយក៏នាំគ្នា ២៤ នាក់តែងខ្លួនបង្កប់កាំភ្លើង លាក់ដាក់កប់នៅក្នុងហោប៉ៅខោ ជាឧបាយកលទើបនឹង មកពីស្រុកបានគ្រឿង បណ្ដាការល្អវិសេស និងកាំភ្លើងក្រំមាសយ៉ាង ល្អយកមកថ្វាយ ដើម្បីសូមជ្រកក្រោម ព្រះបុណ្យបារមីតទៅ ។
កិត្តិសព្ទនេះ ទ្រង់បានជ្រាបដល់ សម្ដេចព្រះរាមាធិបតីគ្រងរាជ្យ ស្ដេចមានប្រាថ្នាចង់បានតែព្រែ ទួន គៀត និង កាំភ្លើងក្រំមាសនោះ ពន់ប្រមាណ ទើបទ្រង់ត្រាស់ប្រាប់ឱ្យល្វីវ៉េឡូហ្សូនាំគ្រឿង បណ្ដាការទាំងនោះ ចូលទៅថ្វាយព្រះអង្គចុះ ។ ម្សៀរសុទ្ធតែកាំភ្លើង សំរាប់ខ្លួនទាំង ២៤ នាក់ក្នុង ហិប ហើយឱ្យទាហានទាំង ២៤ នាក់សែងចូលទៅក្នុងវាំងជា ១២ ស្នែង ។
ខណៈដែលទៅ ដល់ហើយម្សៀរល្វី វ៉េឡូហ្សូ ក៏ថ្វាយកាំភ្លើងទាំងនោះ ដោយយកស្វាយកាំភ្លើងទៅមុន ។ លុះសម្ដេចព្រះរាមគ្រងរាជ្យ លូកព្រះហស្ថមកទទួល ម្សៀរល្វីវ៉េឡូហ្សូ ក្រឡាស់ថ្វាយពីត្រែកាំភ្លើងវិញ ហើយសល់តែកាំភ្លើងគ្រាប់ ចេញទៅត្រូវត្រង់ព្រះឱរាព្រះរាមជើងព្រៃ ហើយស្ដេចក៏សុគត ក្នុងពេលមួយរំពេចនោះទៅ ។ ព្រះរាមាជើងព្រៃ ទ្រង់ឡើងគ្រងរាជ្យនៅឆ្នាំ១៥៩៤ ហើយទ្រង់សុគតដោយគ្រាប់កាំភ្លើងរបស់អេស្ប៉ាញ៉ុល នៅឆ្នាំ១៥៩៦ នៃគ្រិស្ដសករាជ នៅរាជធានីស្រីសន្ធរ ៕
