ភាគច្រើននៃពួកយើងប្រហែល ជាបានដឹងរួចមកហើយ អំពីអត្ថប្រយោជន៍ដ៏ប្រសើរនៃទំពាំងបារាំង ចំពោះសុខភាពរាងកាយ។ ទោះជាយ៉ាងណាបន្លែនេះក៏អាចជះផល ប៉ះពាល់គួរឱ្យព្រួយបារម្ភផងដែរក្នុងករណីទទួលទានច្រើនពេក។ ថាតើទំពាំងបារាំងអាចជះឥទ្ធិពលអវិជ្ជមានអ្វីខ្លះនៅពេលញ៊ាំលើសកម្រិត? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលប៉ះពាល់នៃបន្លែនេះ ៖
១. អាចបង្កបញ្ហាស្ងួតមាត់
នេះក៏ព្រោះតែទំពាំងបារាំងមានលក្ខណៈសម្បត្តិបញ្ចុះទឹកនោមនាំឱ្យនោមញឹក។ ជាលទ្ធផលអាចនឹងបង្កអាការៈខ្សោះជាតិទឹកក្នុងរាងកាយ ហើយស្ងួតក្នុងមាត់។
២. លាមកមានក្លិនឈួលខ្លាំង
នេះក៏ព្រោះតែទំពាំងបារាំងមានផ្ទុកជាតិរ៉ែ sulfur។ ទោះជាយ៉ាងណាកុំបារម្ភ! ត្រឹមតែ ១ថ្ងៃ ឬ ២ថ្ងៃក្រោយបញ្ហានេះនឹងបាត់ទៅវិញ។
៣. គ្មានសុវត្ថិភាពសម្រាប់អ្នកដែលមានអាការៈហើមដោយសារការលើសសារធាតុរាវឡើយ
ចូរប្រយ័ត្នក្នុងការទទួលទានទំពាំងបារាំង ប្រសិនបើអ្នកមានអាការៈហើមដោយសារ បញ្ហាពាក់ព័ន្ធនឹងជំងឺខ្សោយតម្រងនោម ឬជំងឺបេះដូង ដោយបន្លែនេះអាចជះផលប៉ះពាល់គួរឱ្យកត់សម្គាល់។ ដូច្នេះដើម្បីជាការប្រសើរ ចូរពិគ្រោះជាមួយគ្រូពេទ្យជំនាញជាមុនសិន។
៤. អាចបង្កអាការៈអាឡែកស៊ី
រោគសញ្ញាទូទៅបំផុតនៃអាការៈអាឡែកស៊ីនឹងទំពាំងបារាំងរួមបញ្ចូលទាំងការរមាស់ ឡើងក្រហម និងហើមភ្នែក, ហៀរសំបោរ, តឹងច្រមុះ, ឈឺរមាស់បំពង់ក, ក្អកស្ងួត, ឡើងរោលកន្ទួលលើស្បែក, ពិបាកដកដង្ហើម, ចង្អោរចង់ក្អួត, វិលមុខធីងធោង និងឈឺក្បាល។
៥. អាចបង្កអាការៈភើញឹក
អាហារដែលមានផ្ទុកសម្បូរទៅដោយកាបូអ៊ីដ្រាត ជាពិសេសជាតិសសៃដូចជាទំពាំងបារាំងអាចបង្កហ្គាស ក្នុងប្រព័ន្ធរំលាយអាហារ។ ជាលទ្ធផលអ្នកអាចនឹងជួបប្រទះអាការៈភើញឹកខុសធម្មតា ឬហើមពោះ។ ដូច្នេះត្រូវប្រាកដថាអ្នកមិនទទួលទាន បន្លែសុខភាពល្អនេះច្រើនលើសកម្រិតពេក!
៦. គ្មានសុវត្ថិភាពសម្រាប់អ្នកដែលកំពុងប្រើប្រាស់ថ្នាំបញ្ចុះសម្ពាធឈាម
ទោះបីជាទំពាំងបារាំងជាជម្រើសនៃបន្លែដែលប្រសើរសម្អាត គ្រប់គ្រងកម្រិតនៃសម្ពាធឈាម ប៉ុន្តែចូរប្រយ័ត្នក្នុងការទទួលទានបន្លែនេះប្រសិនបើអ្នកទទួលបានវេជ្ជបញ្ជាក្នុងការប្រើប្រាស់ថ្នាំបញ្ចុះ សម្ពាធឈាម។ ទំពាំងបារាំងអាចបង្កប្រតិកម្មជាមួយថ្នាំបញ្ចុះសម្ពាធឈាមបានដែលនាំឱ្យកម្រិតនៃសម្ពាធឈាមធ្លាក់ចុះទាបពេកបង្កជា ស្ថានភាពគ្រោះថ្នាក់៕ប្រភព៖Health.com.kh
