សេអ៊ូល៖ រដ្ឋមន្ត្រីការបរទេសចិនលោក វ៉ាង យី បានឲ្យដឹងនៅថ្ងៃសៅរ៍នេះថា ប្រទេសចិន និងកូរ៉េខាងត្បូង នឹងស្វែងរកដំណើរការ សម្រាប់ដំណោះស្រាយនយោបាយមួយនៃបញ្ហាឧបទ្វីបកូរ៉េ ដោយបង្កើននូវទស្សនវិស័យ នៃកិច្ចខិតខំប្រឹងប្រែងរួមគ្នា ដើម្បីបន្តការសន្ទនាជាមួយកូរ៉េខាងជើង។
លោកវ៉ាង យី បានធ្វើការកត់សម្គាល់ នៅក្នុងពេលពិភាក្សា ជាមួយរដ្ឋមន្រ្តីការបរទេសកូរ៉េខាងត្បូងលោកជុង អ៊ីយយ៉ុង នៅភាគអាគ្នេយ៍ប្រទេសចិនសាយមែន នៅពេលក្រុងសេអ៊ូល ស្វែងរកការធ្វើសមាហរណកម្ម កិច្ចសហប្រតិបត្តិការពីទីក្រុងប៉េកាំង និងប្រទេសដទៃទៀត ដើម្បីឆ្ពោះទៅរករបៀបវារៈដែលជាប់គាំង សម្រាប់សន្តិភាពយូរអង្វែងនៅឧបទ្វីបនេះ។
កិច្ចចរចានេះបានកើតឡើង ចំពេលមានភាពតានតឹងជាថ្មី ដែលបណ្តាលមកពីការបាញ់មីស៊ីលរយៈចម្ងាយខ្លីរបស់ប្រទេសកូរ៉េខាងជើង និងវោហារសាស្រ្តរឹងទទឹងប្រឆាំងនឹងកូរ៉េខាងត្បូង និងរបាយការណ៍របស់សហរដ្ឋអាមេរិក ដែលថារបបផ្តាច់ការនៅតែបន្តអភិវឌ្ឍកម្មវិធីនុយក្លេអ៊ែរនិងមីស៊ីលរបស់ខ្លួន។
លោកវ៉ាង យី បានឲ្យដឹងនៅពេលចាប់ផ្តើមកិច្ចពិភាក្សាថា “កូរ៉េខាងត្បូង និងចិន គឺជាប្រទេសសំខាន់នៅក្នុងតំបន់នេះ និងជាដៃគូយុទ្ធសាស្ត្រ និងមានជំហរស្រដៀងគ្នា ស្តីពីសន្តិភាព និងស្ថិរភាពក្នុងតំបន់” ។
លោកបានបន្ថែមថា“ ប្រទេសចិន និងកូរ៉េខាងត្បូង នឹងស្វែងរកដំណើរការ សម្រាប់ដំណោះស្រាយនយោបាយនៃបញ្ហាឧបទ្វីបកូរ៉េតាមរយៈការសន្ទនា” ។
លោកជុង បានសង្កត់ធ្ងន់ផងដែរថា ប្រទេសទាំងពីរមានគោលបំណងរួមគ្នានៃ“ ការរំសាយអាវុធនុយក្លេអ៊ែរទាំងស្រុង” នៃឧបទ្វីបកូរ៉េ។
លោកបានបន្ដថា“ ខ្ញុំរំពឹងថា ប្រទេសចិន នឹងដើរតួនាទីយ៉ាងសកម្ម សម្រាប់ការគ្រប់គ្រងស្ថិរភាពនៃស្ថានការណ៍នៅឧបទ្វីប និងការរីកចម្រើនគួរឱ្យកត់សម្គាល់នៅក្នុងដំណើរការសន្តិភាពនៅឧបទ្វីបកូរ៉េ”៕
ដោយ ឈូក បូរ៉ា
