សេអ៊ូល ៖ រដ្ឋាភិបាលកូរ៉េខាងត្បូង បានឲ្យដឹងនៅក្នុងរបាយការណ៍ គោលនយោបាយ ស្តីពីទំនាក់ទំនងអន្តរកូរ៉េ សម្រាប់ឆ្នាំនេះថា ប្រទេសកូរ៉េខាងត្បូង នឹងព្យាយាមជួយផ្លាស់ប្តូរកិច្ចចរចានុយក្លេអ៊ែររវាងសហរដ្ឋអាមេរិក និងកូរ៉េខាងជើងឆ្ពោះទៅមុខ និងស្តារកិច្ចពិភាក្សាផ្ទាល់ខ្លួន ជាមួយក្រុងព្យុងយ៉ាង។
របាយការណ៍ដែលបានដាក់ជូនរដ្ឋសភា គឺជាផែនការសកម្មភាពប្រចាំឆ្នាំ ដែលត្រូវបានរៀបចំឡើង ដើម្បីអនុវត្តផែនការលម្អិតរយៈពេល ៥ ឆ្នាំដែលបង្ហាញពីគោលបំណង និងទិសដៅនៃគោលនយោបាយរបស់រដ្ឋាភិបាល ស្តីពីទំនាក់ទំនងអន្តរកូរ៉េ សម្រាប់ឆ្នាំ២០១៨-២០២២ ។
ក្រោមផែនការចុងក្រោយនេះ ប្រទេសកូរ៉េខាងត្បូង បានប្តេជ្ញាជំរុញកិច្ចចរចា នុយក្លេអ៊ែរ ដែលជាប់គាំងរវាងទីក្រុងវ៉ាស៊ីនតោន និងព្យុងយ៉ាង ក្រោមគោលការណ៍“ គ្មានសង្គ្រាម សន្តិសុខទៅវិញទៅមក និងវិបុលភាពរួមគ្នា” ។
សេចក្តីថ្លែងការណ៍ឲ្យដឹងថា“ យើងនឹងធ្វើការយ៉ាងជិតស្និទ្ធ ជាមួយរដ្ឋបាលថ្មីរបស់សហរដ្ឋអាមេរិក និងចេញមកនូវគោលនយោបាយសម្របសម្រួល ដើម្បីធ្វើឱ្យមានវឌ្ឍនភាពក្នុងការសម្រេចបាននូវការរំសាយអាវុធ នុយក្លេអ៊ែរ និងការកសាងសន្តិភាព” ។
រដ្ឋាភិបាលកូរ៉េខាងត្បូង បានឲ្យដឹងទៀងថា ខ្លួននឹងពង្រឹងការទំនាក់ទំនង ជាមួយប្រទេសចិន និងសហគមន៍អន្តរជាតិ ដើម្បីចាប់ផ្តើមដំណើរការសន្តិភាព នៅលើឧបទ្វីបកូរ៉េឡើងវិញ ៕
ដោយ ឈូក បូរ៉ា
