ប្រទេសឥណ្ឌា បានផ្តល់ការអនុញ្ញាតឱ្យប្រើប្រាស់ ជាបន្ទាន់សម្រាប់ថ្នាំគ្រាប់ព្យាបាលកូវីដ របស់ក្រុមហ៊ុន Merck គឺថ្នាំ Molnupiravir។
ជាមួយគ្នានោះដែរវ៉ាក់សាំង Covovax របស់វិទ្យាស្ថានសេរ៉ាំឥណ្ឌា និងវ៉ាក់សាំង Corbevax របស់ក្រុមហ៊ុន Biological E ក៏ត្រូវបានអនុញ្ញាតដូចគ្នាបើតាមការប្រកាសលើ Twitter របស់រដ្ឋមន្ត្រីសុខាភិបាលរបស់ឥណ្ឌា ។ ថ្នាំ Molnupiravir នឹងត្រូវផលិតឡើងក្នុងប្រទេសឥណ្ឌាដោយក្រុមហ៊ុនចំនួន ១៣សម្រាប់ការប្រើប្រាស់មានកម្រិតក្រោម ស្ថានភាពបន្ទាន់សម្រាប់ការព្យាបាល អ្នកជំងឺពេញវ័យដែលកើតកូវីដ១៩។
ក្រុមហ៊ុនផលិតឱសថធំៗដូចជា Aurobindo Pharma, Cipla, Sun Pharmaceuticalsនិងក្រុមហ៊ុនមួយចំនួនទៀត បានចុះហត្ថលេខាលើកិច្ចព្រមព្រៀងអាជ្ញាប័ណ្ណស្ម័គ្រចិត្ត ដែលមិនផ្តាច់មុខជាមួយក្រុមហ៊ុន Merck ដើម្បីផលិតនិងផ្គត់ផ្គង់ថ្នាំ Molnupiravir នៅក្នុងប្រទេសឥណ្ឌា ៕
