គៀវ៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី២៩ ខែមេសា ឆ្នាំ២០២២ថា លោក Volodymyr Zelensky ប្រធានាធិបតីអ៊ុយក្រែន និងអគ្គលេខាធិការអង្គការ សហប្រជាជាតិ (UN) លោក Antonio Guterres កាលពីថ្ងៃព្រហស្បតិ៍ បានជួបពិភាក្សាគ្នា អំពីការជម្លៀសប្រជាជន ចេញពីទីក្រុង Mariupol ដែលត្រូវបានឡោមព័ទ្ធ ។
អ៊ុយក្រែន បានត្រៀមខ្លួនរួចជាស្រេច សម្រាប់កិច្ចពិភាក្សាបន្ទាន់ ដើម្បីជម្លៀសប្រជាជនចេញពីទីក្រុង Mariupol ហើយសង្ឃឹមថា ការចូលរួមរបស់អគ្គលេខាធិការ អង្គការសហប្រជាជាតិ ក្នុងបេសកកម្មនេះនឹងជួយដល់ កិច្ចខិតខំប្រឹងប្រែងជម្លៀសនេះ លោក Zelensky បានប្រាប់ដល់អ្នកសារព័ត៌មាន បន្ទាប់ពីកិច្ចប្រជុំ ។
លោក Zelensky បានថ្លែងថា “យើងឃើញថា ទោះបីជាមានពាក្យសម្តី របស់ប្រធានាធិបតីរុស្ស៊ី លោក ប្លាឌីមៀ ពូទីន អំពីការបញ្ឈប់អរិភាព ក្នុងទីក្រុង Mariupol ក៏ដោយ ទឹកដីនៃរោងចក្រដែក Azovstal គឺស្ថិតនៅក្រោមការ ទម្លាក់គ្រាប់បែកយ៉ាងព្រៃផ្សៃ ដោយកងទ័ពរុស្ស៊ី” ដដែល ។
លោកក៏បានអំពាវនាវផងដែរ ដល់ប្រមុខអង្គការសហប្រជាជាតិ ឱ្យខិតខំប្រឹងប្រែងដើម្បីបញ្ឈប់ “ការនិរទេស” ពលរដ្ឋអ៊ុយក្រែនទៅកាន់ប្រទេសរុស្ស៊ី និងបញ្ជូនជនជាតិអ៊ុយក្រែន ត្រឡប់ទៅប្រទេសកំណើតវិញ ពីប្រទេសរុស្ស៊ី ។
សម្រាប់ការមកកាន់អ៊ុយក្រែននេះរបស់គាត់ លោក Guterres បានថ្លែងថា គាត់កំពុងប្រឹងប្រែង អស់ពីសមត្ថភាព ដើម្បីជួយសង្គ្រោះប្រជាជននៅក្រុង Mariupol ។
អគ្គលេខាធិការអង្គការ សហប្រជាជាតិបានថ្លែងថា “យើងនឹងបន្តអំពាវនាវ ឱ្យមានបទឈប់បាញ់ពេញលេញ ក៏ដូចជាវិធានការជាក់ស្តែងភ្លាមៗ ដើម្បីជួយសង្គ្រោះជីវិតមនុស្ស និងកាត់បន្ថយការឈឺចាប់របស់មនុស្ស” ៕ ប្រែសម្រួលដោយ៖ម៉ៅ បុប្ផាមករា
