ញ៉ូវយ៉ក៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៥ ខែកក្កដា ឆ្នាំ២០២២ថា អតីតប្រធានាធិបតីអាមេរិក លោក ដូណាល់ ត្រាំ បានប្រកាសថា អ្នកស្រី អ៊ីវ៉ាណា ត្រាំ (Ivana Trump) ដែលជាភរិយាទី១ និងជាម្តាយរបស់កូនច្បងទាំង៣ របស់លោក ដូណាល់ ត្រាំ បានទទួលមរណភាព នៅថ្ងៃព្រហស្បតិ៍ ក្នុងវ័យ៧៣ឆ្នាំ ។
លោកស្រី អ៊ីវ៉ាណា ត្រាំ “បានទទួលមរណភាព នៅផ្ទះរបស់គាត់នៅក្នុងទីក្រុងញ៉ូវយ៉ក” លោក ដូណាល់ ត្រាំ បានសរសេរនៅលើ វេទិកាប្រព័ន្ធផ្សព្វផ្សាយ សង្គម Truth Social របស់គាត់យ៉ាងដូច្នេះ ។
គាត់មិនបានផ្តល់មូលហេតុ នៃការស្លាប់នោះទេ ប៉ុន្តែកាសែត The New York Times បានរាយការណ៍ថា មន្រ្តីអនុវត្តច្បាប់កំពុងស៊ើបអង្កេត ថាតើ គាត់បានធ្លាក់ពីលើជណ្តើរ នៅឯផ្ទះល្វែង Manhattan របស់គាត់ឬយ៉ាងណា ។
អ្នកនាំពាក្យនាយកដ្ឋាន ប៉ូលិសក្រុងញ៉ូវយ៉ក បានដល់ប្រាប់ទីភ្នាក់ងារ AFP ក្នុងសេចក្តីថ្លែងការណ៍តាមអ៊ីមែលថា មន្ត្រីបានឆ្លើយតប នឹងការហៅទូរសព្ទនៅអាសយដ្ឋាន របស់គាត់នៅ Upper East Side នៅម៉ោងប្រហែល១២និង៤០នាទីយប់ ។
អ្នកនាំពាក្យបានឲ្យដឹងថា “នៅពេលមកដល់ មន្រ្តីបានសង្កេតឃើញស្ត្រីវ័យ៧៣ឆ្នាំម្នាក់សន្លប់ និងមិនអាចឆ្លើយតបបាន ។ EMS (សេវាសង្គ្រោះបន្ទាន់) បានទៅកាន់ទីតាំងនោះ និងប្រកាសថា ជនរងគ្រោះបានស្លាប់នៅកន្លែងកើតហេតុ” ។
សេចក្តីថ្លែងការណ៍បានឲ្យដឹងទៀតថា “ហាក់ដូចជាមិនមានឧក្រិដ្ឋកម្ម ណាមួយទេ” ហើយថា អ្នកពិនិត្យសុខភាព របស់ទីក្រុងនឹងកំណត់ មូលហេតុនៃការស្លាប់នេះ ។
លោក ដូណាល់ ត្រាំ វ័យ៧៦ឆ្នាំ បានថ្លែងនៅក្នុងបណ្តាញសង្គម របស់គាត់ថា លោកស្រី Ivana Trump “ជាស្ត្រីដ៏អស្ចារ្យម្នាក់ដ៏ស្រស់ស្អាត និងអស្ចារ្យ ដែលបានដឹកនាំជីវិតដ៏អស្ចារ្យ និងជាអ្នកបំផុសគំនិត” ៕
ប្រែសម្រួលដោយ៖ ម៉ៅ បុប្ផាមករា
