តេអេរ៉ង់ ៖ ទីភ្នាក់ងារសារព័ត៌មាន Tasnim បានរាយការណ៍ថា មេបញ្ជាការអ៊ីរ៉ង់ម្នាក់ បាននិយាយកាលពីថ្ងៃអាទិត្យថា អ៊ីរ៉ង់បានបង្កើន ជួរប្រតិបត្តិការ នៃប្រព័ន្ធការពារមីស៊ីល ពីដីទៅអាកាស Bavar-373 រហូតដល់ ៣០០គីឡូម៉ែត្រ ។
មេបញ្ជាការកងទ័ពអាកាសអ៊ីរ៉ង់ លោក Alireza Sabahi-Fard បានឲ្យដឹង នៅឯសាលាយោធា ក្នុងរដ្ឋធានីតេអេរ៉ង់ ថា ការធ្វើឱ្យប្រសើរឡើង ដល់ប្រព័ន្ធការពារក្នុងស្រុក គឺសមាមាត្រទៅនឹងការគំរាមកំហែង ហើយអ៊ីរ៉ង់ បានសាកល្បងប្រព័ន្ធ នៅជួរវាយប្រហារថ្មីនេះ។
នៅក្នុងខែសីហា ឆ្នាំ២០១៩ អ៊ីរ៉ង់ បានដាក់បង្ហាញប្រព័ន្ធការពារចល័ត ដែលបានរចនា និងផលិតក្នុងស្រុក ដែលមានចម្ងាយប្រតិបត្តិការ ២០០គីឡូម៉ែត្រ ដើម្បីស្ទាក់ចាប់គោលដៅអរិភាព ដែលចូលមកប្រទេសរបស់ខ្លួន ។
មេបញ្ជាការអ៊ីរ៉ង់ ត្រូវបានដកស្រង់សម្តីដោយ Tasnim បានលើកឡើងថា “យើងកំពុងឃ្លាំមើលសត្រូវ នៅមូលដ្ឋានរបស់ពួកគេ ។ ជួររ៉ាដារបស់យើង គឺរាប់ពាន់គីឡូម៉ែត្រ” នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
លោកបន្ដថា ប្រព័ន្ធកាំជ្រួចមានរ៉ាដា ចាប់សញ្ញានិងការចូលរួមចំនួនពីរ ដែលអាចទប់ទល់នឹង សង្គ្រាមអេឡិចត្រូនិក និងគ្រាប់បែកអេឡិចត្រុង។ លើសពីនេះ រ៉ាដាមានសមត្ថភាព ចាប់កាំជ្រួចប្រឆាំងវិទ្យុសកម្ម ដែលប្រើសម្រាប់ទប់ទល់ នឹងប្រព័ន្ធការពារដែនអាកាស។
លោកបានបញ្ជាក់ថា ការប្រើប្រាស់កាំជ្រួច ដែលមានរយៈចម្ងាយអតិបរមា ៣០០ គីឡូម៉ែត្រ ប្រព័ន្ធនេះ មានសមត្ថភាពចាប់ និងកំណត់គោលដៅយន្តហោះ របស់សត្រូវហួសពីព្រំដែនអ៊ីរ៉ង់ ចាប់បានរហូតដល់ ៣០០គោលដៅ ក្នុងពេលតែមួយ តាមដាន ៦០គោលដៅ និងវាយប្រហារ ៦ គោលដៅ៕
ប្រែសម្រួល ឈូក បូរ៉ា
