យេរ៉ូសាឡឹម ៖ អ៊ីស្រាអែល គួរតែចាប់ផ្តើមផ្គត់ផ្គង់ ជំនួយយោធាដល់អ៊ុយក្រែន នេះបើតាមរដ្ឋមន្ត្រីក្រសួង កិច្ចការជនភៀសខ្លួន Nachman Shai បានប្រកាសនៅលើបណ្ដាញ Twitter កាលពីថ្ងៃអាទិត្យ ដោយអះអាងថា អ៊ីរ៉ង់ត្រូវបានគេរាយការណ៍ថា បានផ្ទេរមីស៊ីល ផ្លោងទៅឱ្យរុស្ស៊ី។
អ្នកនយោបាយរូបនេះ បានសរសេរលើបណ្ដាញ Twitter ឲ្យដឹងថា “លែងមានការសង្ស័យទៀត ហើយថាតើអ៊ីស្រាអែល គួរឈរនៅកន្លែងណាក្នុងជម្លោះបង្ហូរឈាមនេះ ។ ដល់ពេលហើយសម្រាប់អ៊ុយក្រែន ក្នុងការទទួលបានជំនួយយោធា ដូចដែលសហរដ្ឋអាមេរិក និងប្រទេស ណាតូផ្តល់”។
អ៊ីស្រាអែលបាន នឹងកំពុងផ្គត់ផ្គង់អ៊ុយក្រែន រួចហើយនូវជំនួយមិនសម្លាប់មនុស្ស រួមទាំងឧបករណ៍យោធា និងប្រព័ន្ធការពារមីស៊ីល ដែលផ្គត់ផ្គង់តាមរយៈវិស័យឯកជន ។
ការអះអាងថាអ៊ីរ៉ង់ កំពុងផ្គត់ផ្គង់មីស៊ីលបាលីស្ទីកដល់រុស្ស៊ី ត្រូវបានធ្វើឡើងក្នុងរបាយការណ៍ របស់កាសែត Washington Post កាលពីថ្ងៃអាទិត្យដោយ “មន្ត្រីមកពីប្រទេសសម្ព័ន្ធមិត្តអាមេរិក ដែលតាមដានសកម្មភាព អាវុធរបស់អ៊ីរ៉ង់យ៉ាងដិតដល់” ។
មន្ត្រីដដែលនេះ បើយោងតាម WaPo បានអះអាងកាលពីខែសីហាថា អ៊ីរ៉ង់កំពុងផ្គត់ផ្គង់ យន្តហោះដ្រូនស៊េរី Shahed និង Mohajer-6 ដល់ប្រទេសរុស្ស៊ី សម្រាប់ប្រើប្រាស់ ក្នុងប្រទេសអ៊ុយក្រែន ហើយបានប្រាប់ភ្នាក់ងារ កាលពីថ្ងៃអាទិត្យថា អ៊ីរ៉ង់ នឹងបញ្ជូនយន្តហោះ Mohajer-6 ជាច្រើនគ្រឿង និងយន្តហោះចម្បាំង ជាច្រើនគ្រឿងទៀត ដែលចំនួនធំជាប្រភេទ Shahed-136s ។
អ៊ីរ៉ង់បានបដិសេធថា ខ្លួនមិនបានផ្គត់ផ្គង់សព្វាវុធ ដល់ភាគីណាមួយឡើយ ដោយលើកហេតុផលថា “ការបំពាក់អាវុធពីភាគីនីមួយៗនៃវិបត្តិនឹងអូសបន្លាយសង្គ្រាម” នេះបើយោងតាមការចុះផ្សាយរបស់ទីភ្នាក់ងារ សារព័ត៌មាន RT។
អ្នកនាំពាក្យក្រសួងការបរទេស លោក Nasser Kan’ani បានច្រានចោល “របាយការណ៍អំពីការបញ្ជូនយន្តហោះដ្រូន ទៅឱ្យប្រទេសរុស្ស៊ី សម្រាប់ប្រើប្រាស់ក្នុង សង្គ្រាមអ៊ុយក្រែន” ជាការចោទប្រកាន់គ្មានមូលដ្ឋាន” នៅក្នុងសេចក្តីថ្លែងការណ៍មួយ កាលពីដើមខែនេះ ហើយអ្នកនាំពាក្យវិមានក្រឹមឡាំង លោក Dmitry Peskov បានហៅការអះអាងនេះថា “ក្លែងក្លាយ” ។
អ្នកនាំពាក្យក្រុមប្រឹក្សា សន្តិសុខជាតិអាមេរិក លោក John Kirby បានសារភាពកាលពីខែសីហាថា ទីក្រុងវ៉ាស៊ីនតោន មិនមានភ័ស្តុតាងថា ក្រសួងការពារជាតិរុស្ស៊ី ពិតជាបានទិញយន្តហោះដ្រូន របស់អ៊ីរ៉ង់នោះទេ។
ទោះបីជាយ៉ាងណាក៏ដោយ អ៊ុយក្រែន នៅតែទទូចថា ភាគច្រើននៃយន្តហោះដ្រូនដែលរុស្ស៊ី បានប្រើប្រាស់ក្នុងសមរភូមិ នាពេលថ្មីៗនេះ គឺមកពីប្រទេសអ៊ីរ៉ង់។ ប្រទេសនេះបានដកហូតលិខិតបញ្ជាក់ អត្តសញ្ញាណរបស់ឯកអគ្គរដ្ឋទូតអ៊ីរ៉ង់ ប្រចាំទីក្រុងគៀវ កាលពីខែមុន បន្ទាប់ពីយន្តហោះដ្រូនរុស្ស៊ីជាច្រើនគ្រឿង ត្រូវបានគេរកឃើញថា ស្រដៀងនឹងគំរូរបស់អ៊ីរ៉ង់ ៕
