Warsaw៖ នាយករដ្ឋមន្ត្រីប៉ូឡូញ លោក Mateusz Morawiecki បានឲ្យដឹងថា ប្រទេសប៉ូឡូញ នឹងក្លាយជាអ្នកទទួល មូលនិធិដ៏ធំបំផុត របស់សហភាពអឺរ៉ុប ដើម្បីផ្តល់សំណងដល់ប្រទេស ដែលបានបញ្ជូនសម្ភារៈយោធា ទៅកាន់អ៊ុយក្រែន។
លោក Morawiecki បានសរសេរនៅលើបណ្ដាញ Facebook ថា “ឆាប់ៗនេះយើងនឹងទទួលបានសំណង ប្រហែល ៣០០ លានអឺរ៉ូ (៣២៣,៦លានដុល្លារអាមេរិក) ហើយប៉ូឡូញ នឹងក្លាយជាអ្នកទទួលដ៏ធំបំផុត នៃមូលនិធិអាវុធរបស់សហភាពអឺរ៉ុប” ។
ប្រទេសប៉ូឡូញបានផ្តល់ឱ្យអ៊ុយក្រែន នូវចំនួនដ៏ច្រើននៃរថក្រោះ T-72 សម័យសូវៀតរបស់ខ្លួន ព្រមទាំងរថក្រោះបាញ់កាំភ្លើងស្វ័យប្រវត្តិ Krab និងគ្រាប់រំសេវផងដែរ ។
ថ្មីៗនេះ វ៉ារស្សាវ៉ា បានធ្វើការសម្រេចចិត្ត ប្រគល់យន្តហោះចម្បាំង MiG-29 ចំនួន ៤គ្រឿងរបស់ខ្លួនទៅកាន់ទីក្រុងគៀវ ដោយក្លាយជាប្រទេសដំបូងគេ ដែលផ្តល់យន្តហោះចម្បាំងដល់អ៊ុយក្រែន ៕
ប្រែសម្រួល ឈូក បូរ៉ា
