វ៉ាស៊ីនតោន ៖ រដ្ឋមន្ត្រីការបរទេសអាមេរិក លោក Antony Blinken នឹងធ្វើទស្សនកិច្ចនៅទីក្រុងប៉េកាំង នៅចុងសប្តាហ៍នេះ ដើម្បីជួបពិភាក្សាជាមួយមន្ត្រីចិន ខណៈដែលទីក្រុងវ៉ាស៊ីនតោន ព្យាយាមបន្ថយសីតុណ្ហភាព បន្ទាប់ពីភាពតានតឹងកើនឡើងជាច្រើនខែរវាងប្រទេសទាំងពីរ។
នេះនឹងជាដំណើរទស្សនកិច្ចលើកដំបូងទៅកាន់ប្រទេសចិនរបស់រដ្ឋមន្រ្តីការបរទេសកំពូលអាមេរិកចាប់តាំងពីឆ្នាំ២០១៨មក។ ដំណើរទស្សនកិច្ចដែលបានព្រមព្រៀងដោយប្រធានាធិបតីអាមេរិកលោក ចូ បៃដិន និងប្រធានាធិបតីចិនលោក ស៊ី ជីនពីង កាលពីឆ្នាំមុនក្នុងអំឡុងកិច្ចប្រជុំនៅប្រទេសឥណ្ឌូនេស៊ី ត្រូវបានពន្យារពេលភ្លាមៗពីពេលវេលាដំបូងក្នុងខែកុម្ភៈបន្ទាប់ពី ប៉េងប៉ោងចារកម្មចិនដែលសង្ស័យបានហោះឆ្លងកាត់សហរដ្ឋអាមេរិក។
ក្នុងអំឡុងដំណើរទស្សនកិច្ចរយៈពេលពីរថ្ងៃចាប់ពីថ្ងៃអាទិត្យនេះ លោក Daniel Kritenbrink ជំនួយការរដ្ឋលេខាធិការទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក បានលើកឡើងថា សហរដ្ឋអាមេរិក មានគោលបំណងចំនួនបី គឺការរក្សាបណ្តាញទំនាក់ទំនងបើកចំហ ដើម្បីកាត់បន្ថយហានិភ័យនៃការគណនាខុស ផ្តល់សញ្ញាអំពីផលប្រយោជន៍របស់សហរដ្ឋអាមេរិក និងការរុករកតំបន់នានា និងកិច្ចសហប្រតិបត្តិការដែលមានសក្តានុពល។
លោកបានប្រាប់អ្នកយកព័ត៌មានថា “នេះមិនមែនជាដំណើរទស្សនកិច្ចដែលខ្ញុំនឹងទន្ទឹងរង់ចាំបញ្ជីដ៏វែងនៃការចែកចាយដែលចេញពីវានោះទេ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោក Kurt Campbell អ្នកសម្របសម្រួលកិច្ចការឥណ្ឌូ-ប៉ាស៊ីហ្វិក នៃក្រុមប្រឹក្សាសន្តិសុខជាតិអាមេរិក បានឲ្យដឹងថា ទោះបីជាមានស្ថានការណ៍តានតឹងជាមួយប្រទេសចិនក៏ដោយ ក៏លោករំពឹងថា ដំណើររបស់លោក Blinken នឹងបង្ហាញពីដំណើរទស្សនកិច្ចជាបន្តបន្ទាប់នៅក្នុង “ទិសដៅទាំងពីរ” នៅប៉ុន្មានខែខាងមុខ។
លោក Campbell បានឲ្យដឹងនៅក្នុងសន្និសីទសារព័ត៌មានដដែលជាមួយអ្នកការទូតជាន់ខ្ពស់ថា “ការប្រកួតប្រជែងខ្លាំងទាមទារឱ្យមានទំនាក់ទំនងការទូតខ្លាំង ប្រសិនបើយើងនឹងគ្រប់គ្រងភាពតានតឹង យើងមិនអាចទុកឱ្យការខ្វែងគំនិតគ្នាដែលអាចបំបែកយើងឈរក្នុងផ្លូវនៃការឈានទៅមុខនោះទេ”។
ទោះជាយ៉ាងណាក៏ដោយ លោកបានបន្ថែមថា សហរដ្ឋអាមេរិក នឹងមិនសម្របសម្រួលផលប្រយោជន៍ ឬតម្លៃរបស់ខ្លួនឡើយ ខណៈពេលដែលរក្សាវាមិនស្វែងរកជម្លោះ ឬសង្រ្គាមត្រជាក់ថ្មី។
យោងតាមលោក Kritenbrink បានឲ្យដឹងថា ការប្រកាសអំពីដំណើររបស់លោក Blinken ដែលជាដំណើរទស្សនកិច្ច ថ្នាក់គណៈរដ្ឋមន្ត្រីលើកដំបូងទៅកាន់ប្រទេសចិន ចាប់តាំងពីឆ្នាំ២០១៩ បានកើតឡើងបន្ទាប់ពីអ្នកការទូតកំពូល បាននិយាយតាមទូរស័ព្ទជាមួយរដ្ឋមន្ត្រីការបរទេសចិន Qin Gang៕ ប្រែសម្រួល ឈូក បូរ៉ា
