បរទេស ៖ យោងតាមការចេញផ្សាយរបស់ RT សេតវិមានកំពុងពិចារណាថា តើត្រូវពន្យារពេលការដឹកជញ្ជូនអាវុធ វាយលុកទៅកាន់ប្រទេសអ៊ីស្រាអែល ដើម្បីបង្ខំឱ្យរដ្ឋជ្វីហ្វ កាត់បន្ថយប្រតិបត្តិការយោធារបស់ខ្លួន នៅក្នុងតំបន់ហ្គាហ្សាជាមុនសិន ។
យោងតាមរបាយការណ៍ដែលបានចេញ ផ្សាយដោយកាសែតអន្តរជាតិដូចជា NBC ផងបានឲ្យដឹងដែរថា អ៊ីស្រាអែលបានស្នើឱ្យសហរដ្ឋអាមេរិក បញ្ជូនជំនួយបន្ថែម រួមទាំងគ្រាប់ បែកអាកាសដ៏មានឥទ្ធិពល និងការការពារដែន អាកាសផងដែរ ។
សារព័ត៌មាន NBC News បានដកស្រង់ សម្តីមន្ត្រីអាមេរិកបច្ចុប្បន្ន និងអតីតមន្ត្រីអាមេរិកម្នាក់ ដោយនិយាយថា សហរដ្ឋអាមេរិកកំពុង ពិចារណាលើការពន្យាពេល ឬផ្អាកការចែកចាយ ដោយសង្ឃឹមថា ការធ្វើដូច្នេះនឹងជំរុញឱ្យអ៊ីស្រាអែលចាត់វិធានការ ដូចជាការបើកច្រករបៀងមនុស្សធម៌ ដើម្បីផ្តល់ជំនួយបន្ថែមដល់ជន ស៊ីវិលប៉ាឡេស្ទីន។
គួរឲ្យដឹងដែរថាប្រជាជនប៉ាឡេស្ទីន ជាង២៦០០០នាក់ត្រូវបាន សម្លាប់នៅក្នុងតំបន់ហ្កាហ្សា Gaza ចាប់តាំងពីការប្រយុទ្ធគ្នាបានផ្ទុះឡើងនៅក្នុងខែតុលា នេះបើយោងតាមអាជ្ញាធរ ដែលគ្រប់គ្រងដោយក្រុមហាម៉ាសក្នុងតំបន់ ។ អ៊ីស្រាអែល បានច្រានចោលការចោទ ប្រកាន់ពីសកម្មភាពអំពើប្រល័យពូជសាសន៍ដោយលើកហេតុផលថា ក្រុមហាម៉ាសកំពុងប្រើជន ស៊ីវិលជាខែលការពារ ៕
ប្រែសម្រួល៖ស៊ុនលី
