ក្រុមហង្សក្រហម Liverpool បានធ្លាក់ចេញពីពានរង្វាន់ FA Cup ហើយ ក្រោយពីចាញ់ក្រុម Manchester United ក្នុងលទ្ធផល ៣-២ នៅយប់មិញនេះ។
ការប្រកួតរវាងក្រុមទាំងពីរខាងលើនេះ ពិតជាល្អមើលមែនទែន ដោយសារតែគ្រាប់បាល់កើតឡើងច្រើនគ្រាប់ ។ ដោយឡែក១គ្រាប់ ដែលបិសាចក្រហម យកឈ្នះការប្រកួតនេះបាននោះ គឺកើតចេញពីការទាត់បាល់ពិន័យ របស់ Bruno បញ្ចូលទីយ៉ាងស្អាតតែម្ដង។
សម្រាប់ការទាត់ហ្វ្រីឃីកនេះដែរ លោក Ole បានបញ្ជាក់ថា Bruno ហ្វឹកហាត់ចាំឱកាសនេះ ជាយូរមកហើយ ។ ដោយខ្សែបម្រើខាងលើនេះ បានចំណាយពេល៤៥នាទីឯណោះនៅពេលចប់ការហ្វឹកហាត់ ដើម្បីហាត់ទាត់ហ្វ្រីឃីកនេះម្នាក់ឯង និងបច្ចេកទេសផ្សេងៗ ។ ជាលទ្ធផលឃើញថានៅយប់មិញនេះ រូបគេធ្វើបានល្អមែន អាចស៊ុតផុតដៃរបស់ Alisson ដើម្បីបញ្ចូលទីយ៉ាងស្អាតតែម្ដង ៕
