ក្លឹបកាំភ្លើងធំ Arsenal បានប្រកាសថា David Luiz, Martin Odegaard, Dani Ceballos និង Mat Ryan នឹងត្រូវចាកចេញពីក្លឹប ពេលដែលកុងត្រារបស់ពួកគេអស់នៅបញ្ចប់ខែនេះ ។
Luiz បានផ្ដល់ដំណឹងទៅកាន់ក្លឹបពីបំណង នៃការចាកចេញ តាំងពីខែឧសភា ត្បិត Arsenal មានគម្រោងចង់ពង្រីងកុងត្រា បន្ថែមឲ្យគេក៏ដោយ។ ខ្សែការពារកណ្ដាលរូបនេះផ្ទេរពី Chelsea មកកាំភ្លើងធំក្នុងតម្លៃខ្លួន ៨លានផោនកាលពីឆ្នាំ២០១៩ បង្ហាញខ្លួនបាន៧៣ប្រកួត ។
កីឡាករសញ្ជាតិប្រេស៊ីល បានជួយក្រុមលោក Mikel Arteta ឈ្នះពាន FA Cup និង Community Shield អំឡុងពេល២ឆ្នាំ នៅជាមួយក្លឹប។ Odegaard ដែលចូលរួមជាមួយ Arsenal កាលពីខែមករា និង Ceballos លេងអស់រយៈពេល២ឆ្នាំ ជាកីឡាករខ្ចីជើង គឺត្រូវដល់ពេលត្រឡប់ទៅក្លឹបដើម Real Madrid ទាំងពីរនាក់វិញហើយ។
អ្នកចាំទី Ryan ដែលជាកីឡាករខ្ចីជើងដែរនោះ នឹងត្រឡប់ទៅកាន់ក្លឹបដើមរបស់ខ្លួនវិញគឺ Brighton។ អ្នកចាំទីរូបនេះបង្ហាញខ្លួនបាន៣ប្រកួតក្នុងរយៈពេល៥ខែនៅជាមួយ Arsenal ៕
