ក្នុងការប្រកួតកីឡា បាល់ទាត់ នៅអូឡាំពិកឆ្នាំនេះ ក្រុមយុវជនខ្លាំងៗ ដូចជាអាហ្សង់ទីន បារាំង និងអាល្លឺម៉ង់ បានធ្លាក់ត្រឹមវគ្គសន្សំពិន្ទុ តាមពូលអស់ទៅហើយ ។
យុវជនអាហ្សង់ទីន ដែលធ្លាប់ជាក្រុមខ្លាំង មកពីអាមេរិកខាងត្បូងនោះ នៅអូឡាំពិក២០២០នេះ ហាក់ធ្វើមិនបានល្អនោះទេ ។ ពួកគេបើកឆាកមកលេងចាញ់ក្រុមអូស្ដ្រាលី មុនពេលឈ្នះអេហ្ស៊ីន ហើយប្រកួតចុងក្រោយស្មើអេស្ប៉ាញ ។ លទ្ធផលនេះ ធ្វើឱ្យពួកគេបានលេខ៣ ធ្លាក់បាត់ទៅហើយ។
ដោយឡែកសម្រាប់ក្រុម U23 បារាំងវិញ បើកឆាកមកលេងចាញ់ ក្រុមមិចសិកូ ៤-១ មុនពេលបន្ដទៅឈ្នះអាហ្វ្រិកខាងត្បូង ៤-៣វិញ។ ប្រកួតចុងក្រោយប៉ះម្ចាស់ផ្ទះជប៉ុននៅយប់មិញ ពួកគេលេងចាញ់ ក្នុងលទ្ធផល ៤-០ ទៀត ។ ជាលទ្ធផលបានលេខ៣ ក្នុងពូល ធ្លាក់ដែរទៅហើយ។
ងាកទៅមើលជើងខ្លាំង អាល្លឺម៉ង់ឯណោះវិញ មិនខុសពីបារាំងទេ ដោយ៣ប្រកួត ឈ្នះ១ ស្មើ១ និងចាញ់១ ។ ប្រកួតដំបូងពួកគេចាញ់ ប្រេស៊ីល ៤-២ និងបន្ដទៅឈ្នះអារ៉ាបីសាអូឌីត ៣-២ ។ ប្រកួតចុងក្រោយស្មើកូឌីវ័រ ១-១ ។ លទ្ធផលបានលេខ៣ ក្នុងពូលដែរ ហើយក៏ធ្លាក់ត្រឹមវគ្គនេះ។
ដោយក្រុមឡើងទៅវគ្គមាន ជប៉ុន មិចសិកូ កូរ៉េខាងត្បូង ញ៉ូហ្សើឡែន អេស្ប៉ាញ អេហ្សីប ប្រេស៊ីល និងកូឌីវ័រ ៕
