កីឡា

លោក ស សុខា ទទួលបានការគាំទ្រ ជាប្រមុខ សហព័ន្ធប៉េតង់កម្ពុជា អាណត្តិថ្មីបន្តទៀត

ភ្នំពេញ ៖ ទីបំផុតលោក ស សុខា ត្រូវបានគណៈកម្មាធិការ ប្រតិបត្តិផ្តល់សេចក្តីទុកចិត្ត បោះឆ្នោតជ្រើសរើស ឲ្យបន្តដឹកនាំជាប្រមុខ សហព័ន្ធកីឡាប៊ូល និងប៉េតង់កម្ពុជា សម្រាប់អាណត្តិថ្មី ទី៧ ឆ្នាំ២០២១ដល់២០២៥ តាមរយៈមហាសន្និបាត តាមប្រព័ន្ធ Zoom នៅព្រឹកថ្ងៃទី១៣ ខែសីហា ឆ្នាំ២០២១នេះ ។

ជាមួយនឹងការបន្តតំណែង ជាប្រធានសហព័ន្ធកីឡាប៊ូល និងប៉េតង់កម្ពុជា អាណត្តិទី៧ លោក បានប្តេជ្ញា ចិត្តបំពេញ កិច្ចការងារ សម្រាប់អាណត្តិថ្មី សំដៅបម្រើផលប្រយោជន៍ សហព័ន្ធនិងដើម្បីតបស្នង ចំពោះការលះបង់ របស់ថ្នាក់ដឹកនាំ ជំនាន់មុនព្រមទាំងស្វែងរកលទ្ធផលល្អៗ ជោគជ័យថ្មីៗ ជូនជាតិមាតុភូមិកម្ពុជា ជាបន្តទៀត ។

សមាជិកប្រតិបត្តិ អាណត្តិថ្មីនេះ មានចំនួន១៤រូប ក្នុងនោះលោក ស សុខា ដែលជារដ្ឋលេខាធិការ ក្រសួងអប់រំ យុវជន និងកីឡា និងជាប្រធាន សហព័ន្ធកីឡាប៊ូល និងប៉េតង់កម្ពុជា អមដោយអនុប្រធានចំនួន៥រូប ដូចជា លោក ប៊ូ ជុំសេរី អនុប្រធានទី១ និងអនុប្រធាន៤រូបទៀត លោកអ៊ុក សិទ្ធិជាតិ, លោក ស៊ុម សុជាតិ, អ្នកឧកញ៉ា លាង ឃុន, លោកឧកញ៉ា សុខ ហុង ។ លោក សុខ សប្បាយណាក៏ត្រូវបានទទួលការគាំទ្រឲ្យបន្តធ្វើជា អគ្គលេខាធិការ អមដោយអគ្គលេខាធិការ រងពីររូប គឺឯកឧត្តម ព្រំ ប៊ុណ្ណយី និងកញ្ញា គីន សំណាង លោកណុប ដារ៉ាជាប់ជាអគ្គហិញរញ្ញឹក និងសមាជិក ចំនួន៤រូបផ្សេងទៀត ជាសមាជិកប្រតិបត្តិធម្មតា ។

តាមសេចក្តីប្រកាស ពត៌មាន របស់សហព័ន្ធក្រោយបញ្ចប់ អង្គមហាសន្និបាតនេះ បានបង្ហាញសកម្មភាព និងសមិទ្ធផល ដែលសម្រេចបាន ក្នុងអាណត្តិចាស់ថា សហព័ន្ធកីឡាប៊ូល និង ប៉េតង់កម្ពុជា សូមអបអរសាទរចំពោះលោក ស សុខា រដ្ឋលេខាធិការក្រសួងអប់រំ យុវជន និងកីឡា ដែលទទួលបានការបោះឆ្នោតគាំទ្រ ពីអង្គមហាសន្និបាត ជ្រើសរើសជាប្រធានសហព័ន្ធកីឡាប៊ូល និងប៉េតង់កម្ពុជា អាណត្តិទី៧ ឆ្នាំ២០២១-២០២៥ ដើម្បីបន្តនូវចក្ខុវិស័យ ពីថ្នាក់ដឹកនាំពង្រីកវិសាលភាព និងការអភិវឌ្ឍវិស័យកីឡាប៊ូល និងប៉េតង់កម្ពុជា ទៅគ្រប់បណ្តារាជ
ធានី-ខេត្តស្របតាមលក្ខន្តិកៈនិងបទបញ្ជាផ្ទៃក្នុង ដែលទើបទទួលបានការអនុម័តពីអង្គមហាសន្និបាត។បន្ថែមពីនេះបន្តអនុវត្តផែនការមេ
ឆ្ពោះទៅការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ។

សហព័ន្ធកីឡាប៊ូល និងប៉េតង់កម្ពុជា ត្រូវបានបង្កើតឡើងនៅក្នុងឆ្នាំ១៩៩២ ក្រោមការផ្តួចផ្តើម របស់ថ្នាក់ដឹកនាំជំនាន់មុនដែលមាន សម្តេចវិបុលបញ្ញា សុខ អាន ជាប្រធាន និង សម្តេចក្រឡាហោម ស ខេង ជាប្រធានកិត្តិយស ព្រមទាំងស្ថាបនិកជាច្រើនរូបទៀត ដែលបានលះបង់ កម្លាំងកាយចិត្ត ពេលវេលាដ៏មមាញឹក និងថវិកាផ្ទាល់ខ្លួន ក្នុងការជំរុញវិស័យកីឡាប៊ូល និងប៉េតង់ រហូតមានភាពល្បីល្បាញ និងការកោតសរសើរលើសកលលោក ដោយទទួលបានការប្រសិទ្ធនាម ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ពីសហព័ន្ធកីឡាប៊ូល និងប៉េតង់អន្តរជាតិ ថា “កម្ពុជា ជាមហាអំណាចលើប្រភេទកីឡាប៉េ​​​​​​​​​​​​​​​​​​​​​​តង់”​ ។

បច្ចុប្បន្ន ប៊ូល និងប៉េតង់ ជាកីឡាមួយប្រភេទដ៏មានសក្ដានុពល ដែលទទួលបានការចាប់អារម្មណ៍ និងគាំទ្រពីសាធារណជន គ្រប់ស្រទាប់វណ្ណៈ ព្រមទាំងមានសក្តានុពល ក្នុងការដណ្តើមយកនូវមេដាយជូនជាតិមាតុភូមិ គិតត្រឹមឆ្នាំ២០២០ សហព័ន្ធទទួលបានមេដាយ កម្រិតអន្តរជាតិ សរុប ៣៦៩គ្រឿង (មាស ១០៧ ប្រាក់ ១៣១ និងសំរឹទ្ធ ១៣១) ដែលសមិទ្ធផលគួរជាមោទនៈនេះ គឺអាចកើតមានឡើង ពីការជ្រោមជ្រែង និងការត្រួសត្រាយផ្លូវរបស់ថ្នាក់ដឹកនាំជំនាន់មុន ក្នុងនាមយើង ជាយុវជនជំនាន់ក្រោយ គឺពុំអាចបំភ្លេចនូវស្នាដៃដ៏ឧដុង្គឧត្តមនេះបានឡើយ៕

Most Popular

To Top