ស្ដេចប្រដាល់អ៊ុយក្រែន Wladimir Klitschko និង Vitali Klitschko បានចូលច្បាំង ជាមួយទ័ពអ៊ុយក្រែន ១សប្ដាហ៍មកហើយ ខណៈដែលរូបគេបន្ដបញ្ជាក់ជំហរថាមិនចេញ ពីក្រុងគៀវឡើយ ហើយត្រៀមទប់ទល់ ដល់វិនាទីចុងក្រោយ ។
Vitali Klitschko ជាចៅហ្វាយក្រុង ហើយលោកជាមួយប្អូនប្រុស Wladimir Klitschko កំពុងស្ថិតនៅការពារក្រុងគៀវ មិនឱ្យធ្លាក់ដល់ដៃរុស្ស៊ីនោះទេ ។ ប៉ុន្មានថ្ងៃមកហើយ ទ័ពរុស្ស៊ីព័ទ្ធទីក្រុងនេះជិត ហើយព្យាយាមវាយចូលជានិច្ច ប៉ុន្តែរាល់ការរុលទៅមុខ របស់ទ័ពរុស្ស៊ី មិនអាចជោគជ័យបាននោះទេ។ ពលរដ្ឋនិងទាហាន នៅក្រុងគៀវ ពិតជាអង្គអាច មិនខ្លាចស្លាប់ឡើយ ដើម្បីតតាំងការពារទឹកដី។
អតីតម្ចាស់ខ្សែក្រវាត់ពិភពលោក Vitali បាននិយាយថា៖ “យើងបានសម្លាប់មនុស្សខ្លះហើយ ខ្ញុំអាចស្មានបានប្រហែលជា៦នាក់ ។ យើងមិនចង់សម្លាប់មនុស្សទេ ប៉ុន្តែយើងពិតជាមិនមានជម្រើសឡើយ ។ យើងមិនចាប់អារម្មណ៍ឡើយថា ទាហានរុស្ស៊ីខ្លាំងកម្រិតណា យើងត្រៀមជាស្រេច ដើម្បីប្រយុទ្ធការពារទឹកដី ។ យើងត្រៀមជាសម្រេច ដើម្បីបូជាជីវិត សម្រាប់ទឹកដីរបស់យើង ប្រទេសរបស់យើង និងប្រជាជនរបស់យើង ព្រោះនេះជាទឹកដីកំណើតយើង។ វាជាអនាគយើង យើងមិនអាចឱ្យនរណាម្នាក់ មកលួចវាទៅបានឡើយ” ។
រំលឹកថា អ៊ុយក្រែន ស្ទើរតែរលាយទៅហើយ ដោយសារសង្គ្រាមប៉ុន្មានថ្ងៃមកនេះ ខណៈដែលកងទ័ពរុស្ស៊ី សម្រុកមិនដកដៃឡើយ ទាំងជើងគោក និងជើងអាកាស ។ ជនជាតិអ៊ុយក្រែន ទាំងល្បីមិនល្បី នៅក្រៅប្រទេស បានចូលស្រុកវិញ ទៅជួយច្បាំងជាមួយរុស្ស៊ី ។ ខណៈដែលអ្នកមានទ្រព្យវិញ ក៏បរិច្ចាកប្រាក់មិនតិចលានដុល្លារដែរ ដើម្បីទិញអាវុធទៅធ្វើសង្គ្រាមនេះ ៕
