វីរកីឡាការិនីតេក្វាន់ដូ ស៊ន សៀវម៉ី ទើបតែប្រកាស នឹងចូលរួមប្រកួតប្រជែង ក្នុងព្រឹត្តិការណ៍ស៊ីហ្គេម លើកទី៣២ ដែលគ្រោងរៀបចំ នៅខែឧសភាខាងមុខ ហើយកម្ពុជាគឺជាម្ចាស់ផ្ទះ ។
នេះគឺជាព័ត៌មានដ៏រំភើបមួយ សម្រាប់អ្នកគាំទ្រកម្ពុជា ដោយសារតែស៊ន សៀវម៉ី គឺជាកីឡាការិនីដ៏ឆ្នើម ជាក្ដីរំពឹងមេដាយមាស សម្រាប់កម្ពុជា ។ មែនទែនទៅក្នុងអាជីព ជាកីឡាការិនីតេក្វាន់ដូ សៀវម៉ី ធ្លាប់ឈ្នះមេដាយមាស ដល់ទៅ៣ជំនាន់ ក្នុងព្រឹត្តិការណ៍ស៊ីហ្គេម។
ក្នុងនោះមេដាយមាស លើកដំបូងរបស់ ស៊ន សៀវម៉ី រកបាននៅឆ្នាំ២០១៣ ដែលជាស៊ីហ្គេមលើកទី២៧ រៀបចំនៅប្រទេសមីយ៉ាន់ម៉ា ។ បន្ទាប់មកទៀត មេដាយមាសទី២ រកបាននៅស៊ីហ្គេមលើកទី២៩ ធ្វើនៅប្រទេសម៉ាឡេស៊ី ឆ្នាំ២០១៧ និងចុងក្រោយទទួលបានមេដាយមាស នៅស៊ីហ្គេមលើកទី៣០ ក្នុងប្រទេសហ្វីលីពីន ឆ្នាំ២០១៩ ។
ប្អូនស្រីបង្កើតរបស់លោកគ្រូ ស៊ន អេលីត ក៏ធ្លាប់ឈ្នះមេដាយសំរឹទ្ធ១គ្រឿងដែរ ក្នុងព្រឹត្តិការណ៍ស៊ីហ្គេមលើកទី២៦ ឆ្នាំ២០១១ នៅប្រទេសឥណ្ឌូណេស៊ី។
មុនព្រឹត្តិការណ៍ស៊ីហ្គេមលើកទី៣២ នឹងមកដល់ក្នុងពេលឆាប់ៗខាងមុខ វីរកីឡាការិនី ស៊ន សៀវម៉ី ក៏បានតាំងចិត្តនឹងព្យាយាម ឲ្យអស់ពីសមត្ថភាពដើម្បីឲ្យទង់ជាតិកម្ពុជាឈរខ្ពស់ នៅលើកឆាកប្រកួតលើកទី៣២នេះ ។
ក្រៅពីស៊ីហ្គេម ស៊ន សៀវម៉ី ក៏ធ្លាប់សាងប្រវត្តិសាស្រ្ដដ៏ធំ ជូនជាតិផងដែរ ដោយយកបានមេដាយមាស ជាលើកដំបូងឲ្យកម្ពុជា នៅកីឡាទ្វីបអាស៊ី ឬ Asian Games កាលពីឆ្នាំ២០១៤ ក្នុងទីក្រុង Incheon ប្រទេសកូរ៉េខាងត្បូង ៕
