អាហ្វ្រិក៖សហព័ន្ធបាល់ទាត់អាហ្វ្រិក (CAF) បានប្រកាសកាលពីថ្ងៃពុធថា សហព័ន្ធបាល់ទាត់សេណេហ្គាល់ និងសហព័ន្ធបាល់ទាត់ម៉ារ៉ុកនឹងប្រឈមមុខនឹងការពិន័យផ្នែកហិរញ្ញវត្ថុ និងការព្យួរការប្រកួត បន្ទាប់ពីវគ្គផ្តាច់ព្រ័ត្រពានរង្វាន់ Africa Cup of Nations (AFCON) ឆ្នាំ ២០២៥ បង្កឲ្យភាពវឹកវរលើទីលានប្រកួត យោងតាមការចេញផ្សាយពីគេហទំព័រ RT។
កាលថ្ងៃទី ១៨ ខែមករា ការប្រកួតរវាងក្រុមសេណេហ្គាល់ និងក្រុមម្ចាស់ផ្ទះម៉ារ៉ុកត្រូវបានបំផ្លាញដោយភាពចម្រូង ចម្រាស និងភាពចលាចល។ ដោយមានលទ្ធផលស្មើគ្នា ០-០ នៅចុងម៉ោងធម្មតា ការពិន័យមួយត្រូវបានផ្តល់ទៅឲ្យក្រុមម៉ារ៉ុក បានបង្កឲ្យមានការតវ៉ាពីកីឡាករ និងគ្រូបង្វឹករបស់ក្រុមសេណេហ្គាល់ លោក Pape Bouna Thiaw ដែលបានដឹកនាំក្រុមរបស់លោកចេញពីទីលានមួយរយៈខ្លីដើម្បីតវ៉ា។
បន្ទាប់ពីការពិន័យមិនបានសម្រេច ក្រុមសេណេហ្គាល់បានបន្តរកគ្រាប់បាល់នៅម៉ោងបន្ថែម និងឈ្នះ ១-០។ ឈុតឆាកដ៏តានតឹង រួមទាំងអ្នកគាំទ្រនៅជិតទីលាន និងអាកប្បកិរិយាមិនសមរម្យ បាននាំឲ្យ CAF ថ្កោលទោសអាកប្បកិរិយារបស់ពួកគេ។
នៅខាងក្រុមសេណេហ្គាល់ ក្រុមប្រឹក្សាវិន័យ CAF បានព្យួរគ្រូបង្វឹកលោក Pape Bouna Thiaw មិនឲ្យលេងក្នុងការប្រកួតផ្លូវការចំនួន ៥ លើករបស់ CAF និងពិន័យជាប្រាក់ចំនួន ១០០,០០០ ដុល្លារ។ ស្ថាប័ននេះក៏បានព្យួរកីឡាករសេណេហ្គាល់ Iliman Cheikh Baroy Ndiaye និង Ismaila Sarr មិនឲ្យលេងក្នុងការប្រកួតពីរលើកផងដែរ ។
សហព័ន្ធសេណេហ្គាល់ត្រូវបានពិន័យជាប្រាក់ ៣០០,០០០ ដុល្លារសម្រាប់ការប្រព្រឹត្តមិនសមរម្យរបស់អ្នកគាំទ្រ ៣០០,០០០ ដុល្លារសម្រាប់ការប្រព្រឹត្តមិនសមរម្យរបស់កីឡាករ និងបុគ្គលិក និង ១៥,០០០ ដុល្លារសម្រាប់ការប្រព្រឹត្តមិនសមរម្យរបស់ក្រុម បន្ទាប់ពីត្រូវបានព្រមានច្រើនដង៕
