បរទេស ៖ លោក Jorge Jesus គ្រូបង្វឹកក្រុមជម្រើសជាតិព័រទុយហ្គាល់ បានបញ្ជាក់យ៉ាងច្បាស់ថា ខ្សែប្រយុទ្ធឆ្នើម Cristiano Ronaldo នៅតែមានឱកាសអាចវិលត្រឡប់ មកជួយក្រុមជម្រើសជាតិវិញបានជានិច្ច ប្រសិនបើរូបគេមានបំណងចង់ត្រឡប់មកវិញ នេះបើយោងតាមការចេញផ្សាយ ពីសារព័ត៌មាន BBC ថ្ងៃទី៥ ខែតុលា ឆ្នាំ២០២៦។
ការលើកឡើងនេះ ធ្វើឡើងបន្ទាប់ពីប្រធានក្រុមវ័យ ៤១ឆ្នាំរូបនេះ បានសម្រេចចិត្តចាកចេញពីជំរំប្រមូលផ្តុំនៃព្រឹត្តិការណ៍ Nations League កាលពីសប្តាហ៍មុន ក្រោយពីរូបគេមិនត្រូវបាន ប្តូរឱ្យចូលលេងក្នុងការប្រកួតទល់នឹងន័រវែស និងបានដឹងមុនថា នឹងមិនជាប់ជម្រើសដំបូង សម្រាប់ការប្រកួតទល់នឹងដាណឺម៉ាក។
Ronaldo ដែលជាម្ចាស់កំណត់ត្រាពិភពលោកស៊ុតបញ្ចូលទី ១៤៦គ្រាប់ ក្នុងការបង្ហាញខ្លួន ២៣៤ដង ឱ្យព័រទុយហ្គាល់ បានបង្ហាញការខកចិត្តយ៉ាងខ្លាំង។ នៅក្នុងជំនួបប៉ះន័រវែស រូបគេត្រូវបានគេរាយការណ៍ថាមានការខឹងសម្បារ បន្ទាប់ពីត្រូវបានគ្រូបង្វឹកប្រាប់ឱ្យកម្តៅសាច់ដុំក្នុងវគ្គទីពីរ ប៉ុន្តែទីបំផុតមិនត្រូវបានប្តូរឱ្យចូលលេងនោះទេ។
នេះគឺជាលើកទីមួយហើយគិតចាប់តាំងពីឆ្នាំ២០០៨ មក ដែលអតីតតារាឆ្នើមរបស់ Man Utd និង Real Madrid រូបនេះ មានឈ្មោះជាកីឡាករបម្រុង តែមិនត្រូវបានប្រើប្រាស់សោះក្នុងការប្រកួតផ្លូវការ។
ក្រោយពីចាកចេញពីជំរំប្រមូលផ្តុំ ខ្សែប្រយុទ្ធរបស់ក្លិប Al-Nassr រូបនេះបានសរសេរសារលើបណ្តាញសង្គមថា៖ “នៅពេលវេលាសមស្របមកដល់ ខ្ញុំនឹងប្រាប់ការពិតដល់ប្រជាជនព័រទុយហ្គាល់ទាំងអស់អំពីមូលហេតុដែលខ្ញុំចាកចេញពីក្រុមជម្រើសជាតិ ដែលជាកន្លែងខ្ញុំតែងតែលះបង់គ្រប់យ៉ាងជូន។”
លោក Jorge Jesus ដែលធ្លាប់ធ្វើជាគ្រូបង្វឹករបស់ Ronaldo នៅក្លិប Al-Nassr ផងនោះ បានអះអាងថា លោកតែងតែមានគម្រោងជជែកពិភាក្សាបញ្ហានេះជាមួយគេ ក្រោយបញ្ចប់ការប្រកួតឈ្នះន័រវែស ២-១។ លោកបានបញ្ជាក់ថា៖ “ប្រសិនបើគាត់ចង់ គាត់នឹងត្រឡប់មកក្រុមជម្រើសជាតិវិញ។
យើងអាចជជែកគ្នាមុនការកោះហៅលើកក្រោយ ប៉ុន្តែ Cris (Ronaldo) ជាអ្នកសម្រេចចិត្ត។ Cristiano គួរតែបញ្ចប់ពេលវេលារបស់គាត់ជាមួយក្រុមជម្រើសជាតិតាមរបៀបដែលគាត់ចង់បាន… កាលពីខ្ញុំចូលដឹកនាំដំបូង ខ្ញុំបានប្រាប់គាត់ថា ‘ខ្ញុំត្រូវការអ្នក ខ្ញុំត្រូវការឱ្យអ្នកនៅក្បែរខ្ញុំ ទោះបានលេង ឬមិនបានលេងក៏ដោយ’ ហើយពេលនេះ ខ្ញុំនៅតែនិយាយពាក្យដដែល។”
ស្របពេលជាមួយគ្នានេះ មិត្តរួមក្រុមរបស់គេក៏បានបង្ហាញការគាំទ្រផងដែរ។ ខ្សែការពារ Joao Cancelo បានប្រាប់ស្ថានីយទូរទស្សន៍ RTP ថា៖ “Cristiano គឺជាប្រធានក្រុមរបស់យើង និងជាកីឡាករដ៏អស្ចារ្យបំផុតមិនធ្លាប់មានរបស់ព័រទុយហ្គាល់។ រឿងរ៉ាវប្រាកដជានឹងបញ្ចប់ក្នុងផ្លូវដ៏ល្អបំផុត។” ចំណែកកីឡាករ Nuno Mendes បានបន្ថែមថា ប្រសិនបើ Ronaldo ត្រឡប់មកវិញ ក្រុមទាំងមូលនឹងបើកដៃទទួលស្វាគមន៍ជានិច្ច។
គួររំលឹកផងដែរថា ព័រទុយហ្គាល់នឹងត្រូវបើកទ្វារផ្ទះទទួលស្វាគមន៍ដាណឺម៉ាក សម្រាប់ការប្រកួតពូល A4 នៅថ្ងៃទី១៤ ខែវិច្ឆិកា មុននឹងត្រូវធ្វើដំណើរទៅតទល់នឹងវែលស៍នៅ ៣ថ្ងៃបន្ទាប់។ ក្នុងអវត្តមានរបស់ម្ចាស់ពាន Ballon d’Or ៥សម័យ និងជាវីរបុរសដែលជួយព័រទុយហ្គាល់ឈ្នះ Euro 2016 រូបនេះ កីឡាករចំណូលថ្មី Goncalo Ramos របស់ក្លិប AC Milan ធ្វើបានយ៉ាងល្អ ដោយអាចស៊ុតបញ្ចូលទីបានគ្រប់ការប្រកួតទាំង ៣ដង ដែលគេបានជាប់ជម្រើសដំបូង៕
ប្រែសម្រួល៖ គីរី
