ភ្នំពេញ៖ ជារឿងដ៏ចាប់អារម្មណ៍មួយសម្រាប់ទស្សនិកជន ជាពិសេសអ្នកគាំទ្រលោក ខេមរៈ សិរីមន្ត បន្ទាប់ពីលោក អ៊ុំ រាត្រី ជាអភិបាលខេត្ត បន្ទាយមានជ័យបានធ្វើលិខិតថ្លែងអំណរគុណមួយចំពោះកំពូលតារាចម្រៀងរូបនេះ ដែលបានបានបរិច្ចាគនូវថវិការចំនួន២,០០០,០០០$(ពីរលានដុល្លារ)ស្ថាបនាផ្លូវប្រវែង២២គីឡូម៉ែត្រ និងកាយប្រពន្ធទឹកប្រវែង១២គីឡូម៉ែត្រ នៅខេត្តបន្ទាយមានជ័យ។
នៅក្នុងលិខិតថ្លែងអំណរគុណចុះថ្ងៃទី១០ខែធ្នូឆ្នាំ២០២១របស់រដ្ឋបាលខេត្តបន្ទាយមានជ័យ មានខ្លឹមសារយ៉ាងដូច្នេះថា “អភិបាលនៃគណៈអភិបាលខេត្តបន្ទាយមានជ័យសូមថ្លែងអំណរគុណចំពោះលោកខេម ប៊ុនថៃ (ខេមរៈ សិរីមន្ដ)ដែលបានឧបត្ថម្ភថវិការចំនួន២,០០០,០០០$ សម្រាប់ស្ថាបនាផ្លូវប្រវែង២២គីឡូម៉ែត្រ និងកាយប្រព័ន្ធទឹកប្រវែង១២គីឡូម៉ែត្រ ស្ថិតក្នុងភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។សូមគោរពជូនពរលោកជូបប្រទះពុទ្ធពរទាំង៤ប្រការគឺអាយុ វណ្ណៈ សុខៈ ពលៈ កុំបីឃ្លាងឃ្លាតឡើយ”។
យ៉ាងណាមិញនេះពុំមែនជាលើកទីមួយឡើយ សម្រាប់លោក ខេមរៈ សិរីមន្ត និងភរិយា ដែលបានចំណាយថវិការផ្ទាល់ខ្លួនដើម្បីជួយដល់សង្គមជាតិ ។ ហើយកាលពីព្រឹកថ្ងៃទី២២ខែធ្នូឆ្នាំ២០២២ នេះ លោកខេមរៈ សិរីមន្ដ និងភរិយា ក៏បានលេចមុខរួមគ្នាក្នុងពិធីចែកអំណោយ ជូនដល់សិល្បករដែលមានជីវភាពខ្វះខាត និងចាស់ជរាចំនួន៥០នាក់នៅសមាគមមិត្តសិល្បៈស្ម័គ្រចិត្តជួយសង្គមផងដែរ ។
លោក ខេមរៈ សិរីមន្ត បាននិយាយនៅក្នុងពិធីចែកអំណោយ ជូនដល់សិល្បករដែលមានជីវភាពខ្វះខាត និងចាស់ជរា នោះថា លោកនិងក្រុមគ្រួសារចំណាយថវិការសរុបអស់ចំនួនជាង១០០០ដុល្លារក្នុងការផ្ដល់ជូនថវិការជូនសិល្បកររៀមច្បងម្នាក់ៗចំនួន២០ម៉ឺនរៀល រួមទាំងគ្រឿងឧបភោគមួយចំនួនទៀតនោះបានថ្លែងថាលោកបានធ្វើកិច្ចការងារសប្បុរសធ័មជាច្រើនលើកច្រើនសារមកហើយតែមិនអាចដឹងថាចំណាយអស់ចំនួនថវិការសរុបចំនួនប៉ុន្មាននោះទេ ៕ ដោយ៖ ម៉ានី
