ជារឿងដ៏គួរឱ្យសោកស្តាយបំផុត ដែលរថយន្តទំនើបជិត ៤ពាន់គ្រឿង ត្រូវបានធ្លាក់ចូលទៅបាតសមុទ្រ បន្ទាប់ពីកប៉ាល់ ដឹករថយន្តទាំងនេះ បានផ្ទុះឆេះ។
កប៉ាល់នេះ មានឈ្មោះថា Felicity Ace បានផ្ទុះឆេះនៅមហាសមុទ្រអាត្លង់ទិច ក្នុងអំឡុងដំណើរពីប្រទេសអាល្លឺម៉ង់ ទៅកាន់សហរដ្ឋអាមេរិក កាលពីថ្ងៃទី១៦កុម្ភៈកន្លងទៅ ហើយក៏បានលិចចូលសមុទ្រនៅ២សប្តាហ៍បន្ទាប់ ។ តែយ៉ាងណា ចំពោះក្រុមនាវិក គឺបានជម្លៀសខ្លួនចេញដោយសុវត្ថិភាព ។ ឯមូលហេតុនៃការឆេះ មិនទាន់ដឹងច្បាស់នៅឡើយ។
កប៉ាល់ Felicity Ace បានដឹករថយន្តប្រភេទប្រើសាំង និងអគ្គិសនី របស់ក្រុមហ៊ុន Porsches, Bentleys, Volkswagen និង Lamborghinis ព្រមទាំងរថយន្តប្រណិតដទៃទៀត។
ក្រុមហ៊ុន Volkswagen ឱ្យដឹងថា ការខូចខាតរថយន្តនេះ គឺជាបន្ទុករបស់ក្រុមហ៊ុនធានារ៉ាប់រង ដែលនឹងចំណាយប្រមាណ ១៥៥លានដុល្លារ។ ចំណែក Bently បញ្ជាក់ថា នៅលើកប៉ាល់នោះ គឺមានរថយន្តរបស់ខ្លួនចំនួន ១៨៩គ្រឿង និង Porsche មានចំនួន ១១០០គ្រឿង៕
