អ្នកចាត់ការក្លឹប Barcelona លោក Xavi Hernandez ថារឿង Lionel Messi ត្រលប់មក Barca វិញឬអត់ ចាំពិភាក្សាក្រោយក្លឹបឈ្នះពាន La Liga សិន។
ឆ្លើយតបនឹងសំណួរអ្នកសារព័ត៌មាន លោក Xavi បាននិយាយថា លោកមិនដឹងថា Messi អាចត្រលប់មក Barcelona វិញ ឬអត់នោះទេ។
អ្វីដែលសំខាន់ពេលនេះ គឺការត្រៀមខ្លួនសម្រាប់ប្រកួតបន្ទាប់ ហើយនៅពេលដែល Barca ឈ្នះពានលីគកំពូលអេស្ប៉ាញ ចាំនិយាយរឿងផ្ទេរ Messi មកវិញ។ នេះបើតាមអ្នកចាត់ការសញ្ជាតិអេស្ប៉ាញ។
ទោះជាយ៉ាងណា បើតាមការចុះផ្សាយរបស់អ្នកសារព័ត៌មានល្បីឈ្មោះ Fabrizio Romano បានឲ្យដឹងថា Xavi កំពុងជំរុញយ៉ាងខ្លាំង ធ្វើយ៉ាងណាឲ្យ Messi ត្រលប់មក Barca វិញ។ បើតាមប្រភពដដែល Xavi បានទាក់ទងតាមទូរស័ព្ទជាមួយ Messi ជាច្រើនលើកច្រើនសារ។
Barcelona កំពុងឈរកំពូលតារាង La Liga មាន ៧៦ ពិន្ទុ ដាច់ ១១ ពិន្ទុពី Real Madrid ដែលកំពុងឈរលេខ ២។
Messi គឺជាវីរបុរសក្លឹប Barca។
កីឡាករអាហ្សង់ទីនលេងឲ្យក្លឹបប្រមាណ ១៧ ឆ្នាំ ដោយលេងបាន ៧៧៨ ប្រកួត និងស៊ុតចូល ៦៧២ គ្រាប់។
បញ្ហាហិរញ្ញវត្ថុមួយចំនួនរបស់ក្លឹបអ្នកមានបុណ្យ បានបណ្ដាលឲ្យ Messi ចាកចេញពីក្លឹបទៅចូលរួមជាមួយ PSG កាលពីខែសីហាឆ្នាំ ២០២១។
នាពេលថ្មីៗនេះ មានពាក្យចចាមអារ៉ាមចុះផ្សាយ ដោយសារព័ត៌មានល្បីឈ្មោះមួយចំនួន បានលើកឡើងថា Messi នឹងចាកចេញពី PSG ដើម្បីទៅចូលរួម Barca វិញ៕ ប្រភព៖ sabay
