ចិន៖ នេះបើតាមរដ្ឋបាលបេតិកភណ្ឌវប្បធម៌ជាតិបានប្រកាសកាលពីថ្ងៃអាទិត្យនៅទីក្រុងឆ្នេរសមុទ្រសានយ៉ា ខេត្តហៃណានបាននិយាយថា កប៉ាល់បុរាណចំនួន២គ្រឿងដែលប្រហែលជាមានអាយុកាលតាំងពីពាក់កណ្តាលរាជវង្ស Ming (១៣៦៨-១៦៤៤) ត្រូវបានគេរកឃើញនៅតំបន់ទឹកជម្រៅប្រហែល ១,៥០០ ម៉ែត្រនៅសមុទ្រចិនខាងត្បូង យោងតាមការចេញផ្សាយពីគេហទំព័រឆៃណាឌៀលី។
ក្រុមស្រាវជ្រាវវិទ្យាសាស្ត្រមកពីវិទ្យាស្ថានវិទ្យាសាស្ត្រ និងវិស្វកម្មសមុទ្រជ្រៅនៃបណ្ឌិត្យសភាវិទ្យាសាស្ត្រចិន បានរកឃើញការលិចកប៉ាល់នៅលើជម្រាលទ្វីបកាលខែតុលា។ នេះជាលើកទីមួយហើយដែលចិនបានរកឃើញកន្លែងលិចកប៉ាល់បុរាណដ៏ធំបែបនេះជ្រៅក្រោមសមុទ្រ។ កប៉ាល់លិចត្រូវបានអ្នកស្រាវជ្រាវដាក់ឈ្មោះថា ជា កប៉ាល់លិចទ្វីបភាគពាយ័ព្យលេខ១ និងលេខ២ នៅសមុទ្រចិនខាងត្បូង។
យោងតាមលោក Yan Yalin ប្រធាននាយកដ្ឋានបុរាណវិទ្យានៃរដ្ឋបាលបេតិកភណ្ឌវប្បធម៌ជាតិ ការស៊ើបអង្កេតបឋមបានបង្ហាញថា សារីរិកធាតុដែលបានមកពីការលិចកប៉ាល់លេខ ១ត្រូវបានរាយប៉ាយលើផ្ទៃដីប្រហែល ១០,០០០ម៉ែត្រការ៉េ។ វាត្រូវបានគេប៉ាន់ប្រមាណថា វត្ថុបុរាណវប្បធម៌ជាង ១០០,០០០ ភាគច្រើនជាវត្ថុប៉សឺឡែន កំពុងលាក់ទុកនៅនឹងកន្លែង ដោយសារកប៉ាល់ភាគច្រើននៅតែកប់នៅក្នុងខ្សាច់ ហើយផ្នែកខ្លះលាតត្រដាងរបស់វាត្រូវបានកប់ដោយសារីរិកធាតុរហូតដល់ ៣ ម៉ែត្រ។
នៅលើការលិចកប៉ាល់លេខ ២មានចម្ងាយប្រហែល ២០ គីឡូម៉ែត្រពីកប៉ាល់ទី១ នោះ គេបានរកឃើញឈើកែច្នៃជាច្រើនដុំ រួមជាមួយនឹងវត្ថុសេរ៉ាមិចមួយចំនួនតូច។ ដោយផ្អែកលើការសិក្សាអំពីសារីរិកធាតុប៉សឺឡែនមួយចំនួនត្រូវបានសង្គ្រោះពីកន្លែងនោះ ការលិចកប៉ាល់លេខ១ ប្រហែលជាមានតាំងពីរជ្ជកាលអធិរាជ Zhengde (១៥០៦-២១) និងលេខ ២ ដល់រជ្ជកាលអធិរាជ Hongzhi (១៤៨៨-១៥០៥ ) ។
លោក Yan បានបន្តថា សារីរិកធាតុដែលត្រូវបានថែរក្សាយ៉ាងល្អមានតម្លៃប្រវត្តិសាស្រ្ត វិទ្យាសាស្រ្ត និងសិល្បៈខ្ពស់។ វាអាចជាការរកឃើញបុរាណវត្ថុលំដាប់ពិភពលោកនៅក្នុងសមុទ្រជ្រៅ។ លោកបានបន្ថែមថា ការរកឃើញនេះគឺជាភស្តុតាងសំខាន់នៃផ្លូវសូត្រសមុទ្របុរាណ និងរបកគំហើញដ៏សំខាន់សម្រាប់ការសិក្សាប្រវត្តិសាស្ត្រក្នុងពាណិជ្ជកម្មក្រៅប្រទេសរបស់ចិន ការធ្វើនាវាចរណ៍ និងប៉សឺឡែន (ផលិតផល)៕ដោយ៖លី ភីលីព
