ភ្នំពេញ៖ សមាគមកីឡាចំបាប់ក្រសួងមហាផ្ទៃដណ្តើមមេដាយមាស ៨ គ្រឿងច្រើនជាងគេនៃព្រឹត្តិការណ៍ការរៀបចំការប្រកួតកីឡាចំបាប់ សម័យ-បុរាណ ជ្រើសរើសជើងឯកថ្នាក់ជាតិប្រចាំ ឆ្នាំ២០២៣ ក្នុងក្លិប និងសមាគមចំនួន១០ ចូលរួមឆ្នាំនេះ ការប្រកួតឡើងដោយសហព័ន្ធកីឡាចំបាប់កម្ពុជានឹងប្រព្រឹត្តទៅ ចាប់ពីថ្ងៃទី១៨ ដល់ថ្ងៃទី២១ ខែមករា ឆ្នាំ២០២៤ នៅពហុកីឡាដ្ឋានជាតិអូឡាំពិក រាជធានីភ្នំពេញ ក្រោមការប្រើប្រាស់ថវិកាឧបត្ថម្ភប្រចាំឆ្នាំរបស់ក្រសួងអប់រំ យុវជន និងកីឡា។
ក្នុងឱកាសចូលរួមប្រគល់ និងប្រកាសបិទព្រឹត្តិការណ៍ការរៀបចំការប្រកួតកីឡាចំបាប់ សម័យ-បុរាណ ជ្រើសរើសជើងឯកថ្នាក់ជាតិប្រចាំ ឆ្នាំ២០២៣មានការអញ្ជើញជាកិត្តិយសពីសំណាក់លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជាឲ្យលោក វ៉ាត់ ចំរើន ប្រធានសហព័ន្ធកីឡាចំបាប់កម្ពុជា និងរដ្ឋលេខាធិការនៃក្រសួងអប់រំ យុវជន និងកីឡា។
សមាគមកីឡាចំបាប់ក្រសួងមហាផ្ទៃដណ្តើមមេដាយមាស ៨ គ្រឿង ប្រាក់ ៩ គ្រឿង និងសំរិទ្ធ ១៣ គ្រឿង ក្លិបកីឡាចំបាប់ គិរី បារមី ដំរីមានរិទ្ធ (ខេត្តកំពង់ឆ្នាំង) ដណ្តើមមេដាយមាស ១ គ្រឿង ប្រាក់ ១ គ្រឿង និងសំរិទ្ធ ១ គ្រឿង ក្លិបកីឡាចំបាប់ យាយព្រីងមានរិទ្ធ (ខេត្តកំពង់ឆ្នាំង) ដណ្តើមមេដាយមាស ១ គ្រឿង និងប្រាក់ ១ គ្រឿង ក្លិបកីឡាចំបាប់ ឬទ្ធិ សែន (ខេត្តកំពង់ឆ្នាំង) ដណ្តើមមេដាយមាស ១ គ្រឿង និងសំរិទ្ធ ១ គ្រឿង និងក្លិបកីឡាចំបាប់ បារមី មេទ័ពឯក (ខេត្តកណ្តាល) ដណ្តើមមេដាយមាស ១ គ្រឿង និងសំរិទ្ធ ១ គ្រឿង។
គ្រូបង្វឹក ប្រភិតូ និងក្រុមកីឡាករ-កីឡាការិនីចំបាប់ចំនួន ៩០ នាក់មកពីក្លិប និងសមាគមចំនួន ១០ ក្នុងនោះកីឡាករចំនួន ៤៦ នាក់ និងកីឡាការិនី ២០ នាក់ រួមមានសមាគមកីឡាចំបាប់ ក្រសួងមហាផ្ទៃ ក្លិបកីឡាចំបាប់ គិរី បារមី ដំរីមានរិទ្ធ (ខេត្តកំពង់ឆ្នាំង) ក្លិបកីឡាចំបាប់ ឬទ្ធិ សែន (ខេត្តកំពង់ឆ្នាំង) និងក្លិបកីឡាចំបាប់ ប្រយ៉ាប មានរិទ្ធ (ខេត្តកំពង់ឆ្នាំង) ។
ចំពោះក្លិបកីឡាចំបាប់ ឃ្លាំងមឿន (ខេត្តពោធិ៍សាត់) ក្លិបកីឡាចំបាប់ ព្រះធាតុ (ខេត្តពោធិ៍សាត់) ក្លិបកីឡាចំបាប់ខេត្តកណ្តាល ក្លិបកីឡាចំបាប់ បារមី មេទ័ពឯក (ខេត្តកណ្តាល) ក្លិបកីឡាចំបាប់ យាយព្រីងមានរិទ្ធ (ខេត្តកំពង់ឆ្នាំង) និង ក្លិបកីឡាចំបាប់ បក្សីចាំក្រុង៕ ដោយ៖លី ភីលីព
