ចក្រភពអង់គ្លេស៖ យោងតាមការចេញផ្សាយពីគេហទំព័រ RTបានប្រាប់ឲ្យដឹងថា សមាជិកសភាអង់គ្លេសជាង ៥០ រូបបានជំរុញឲ្យរដ្ឋាភិបាល បញ្ឈប់គំនូរជីវចលកុមារដ៏ពេញនិយមរបស់រុស្ស៊ី “Masha and the Bear” ពីការចាក់បញ្ចាំងនៅចក្រភពអង់គ្លេស ដោយអះអាងថា វាអាចត្រូវបានប្រើជាឧបករណ៍ “ឃោសនា”។
រឿងភាគគំនូរជីវចលនេះ ដែលផ្អែកលើរឿងនិទានប្រជាប្រិយប្រពៃណីរបស់រុស្ស៊ី តាមដានដំណើរផ្សងព្រេងរបស់ក្មេងស្រីតូចម្នាក់ដែលមានចរិតឆេវឆាវ និងខ្លាឃ្មុំសៀកចូលនិវត្តន៍។ វាគឺជាកម្មវិធីកុមារដ៏ពេញនិយមបំផុតមួយតាមអ៊ីនធើណេត ដោយមានវគ្គមួយគឺ Recipe for Disaster ត្រូវបានមើលជាង ៤.៦ ពាន់លានដងនៅលើបណ្តាញសង្គម YouTube។
កាលពីខែមុន Netflix បានទិញសិទ្ធិសម្រាប់រដូវកាលពីរបន្ថែមទៀតនៃកម្មវិធីនេះ និងបានពង្រីកកិច្ចព្រមព្រៀងអាជ្ញាប័ណ្ណសម្រាប់រដូវកាលដែលមានស្រាប់ និងផ្នែកបន្ថែម។ គំនូរជីវចលនេះមានក្នុងចក្រភពអង់គ្លេសនៅលើ ITVX។
ជាការឆ្លើយតប ក្រុមសមាជិកសភាអង់គ្លេសឆ្លងគណបក្សបានសរសេរទៅកាន់លោកស្រី Lisa Nandy រដ្ឋមន្ត្រីក្រសួងវប្បធម៌ចក្រភពអង់គ្លេស ដោយអះអាងថា ឈុតឆាកមួយចំនួនក្នុងរូបតុក្កតានេះមាន “ខ្លឹមសារឃោសនា” ហើយត្រូវបានគេសន្មត់ថា ធ្វើឲ្យរូបភាពយោធាសូវៀតមានលក្ខណៈធម្មតាសម្រាប់កុមារ ដោយសំដៅទៅលើឈុតឆាកមួយចំនួនដែល Masha លេចឡើងក្នុងអ្វីដែលពួកគេបានពិពណ៌នាថាជាមួកសុវត្ថិភាពរបស់ក្រុមនាវិករថក្រោះ សម្លៀកបំពាក់បែបសូវៀត និងមួកឆ្មាំព្រំដែន។
អ្នកតាក់តែងច្បាប់ក៏បានយោងទៅលើការចោទប្រកាន់ពីមុនប្រឆាំងនឹងរូបតុក្កតានេះ រួមទាំងការអះអាងរបស់ទីក្រុងគៀវថាខ្លឹមសាររបស់កុមារជាភាសារុស្ស៊ីជាការគំរាមកំហែងដល់សន្តិសុខជាតិ និងការចោទប្រកាន់ថ្មីៗរបស់រដ្ឋមន្ត្រីការបរទេសអេស្តូនី Margus Tsahkna ថា រូបតុក្កតានេះបង្កប់នូវប្រធានបទយោធានិយមក្នុងការកម្សាន្តសម្រាប់កុមារ៕
