RABAT ៖FIFA បានសុំទោសដល់សមាជិករបស់ខ្លួន ចំពោះកំហុសបានធ្វើឡើងលើសំណើ ដែលបានបោះបង់ចោល របស់ខ្លួនក្នុងការលក់សិទ្ធិពាណិជ្ជកម្ម ទៅឲ្យព្រឹត្តិការណ៍ World Cup ខណៈថ្នាក់ដឹកនាំរបស់សហព័ន្ធនេះ បានបញ្ជាក់ជាថ្មីនូវការគាំទ្រ របស់ខ្លួន ចំពោះលោកប្រធាន Gianni Infantino បន្ទាប់ពីកិច្ចប្រជុំវិបត្តិមួយ នៅប្រទេសម៉ារ៉ុកកាលពីថ្ងៃពុធ យោងតាមការចេញផ្សាយពីគេហទំព័រ Japan Today ។
សំណើលក់ភាគហ៊ុន ២០ ភាគរយក្នុងអង្គភាពសិទ្ធិពាណិជ្ជកម្មថ្មីមួយទៅឲ្យវិនិយោគិនឯកជនក្នុងកិច្ចព្រមព្រៀងមួយ អាចរៃអង្គាសបានប្រហែល ៤.២ ពាន់លានដុល្លារ បានបង្កឲ្យមានប្រតិកម្ម យ៉ាងខ្លាំងក្លាមួយ ហើយត្រូវបានដកចេញកាលពីថ្ងៃសុក្រសប្តាហ៍មុន ។ លោក Infantino បានរងការរិះគន់យ៉ាងខ្លាំង រួមទាំងការរិះគន់មួយចំនួនពីខាងក្នុង FIFA ដែលបានលើកឡើងនូវសំណួរជុំវិញ ការបោះឆ្នោតឡើងវិញ របស់លោកជាប្រធាននៅខែមីនាខាងមុខ។
សេចក្តីថ្លែងការណ៍នេះបាននិយាយថា បន្ទាប់ពីកិច្ចប្រជុំមួយនៅទីក្រុងរ៉ាបាត ប្រទេសម៉ារ៉ុក អគ្គលេខាធិការ FIFA និងសមាជិកក្រុមប្រឹក្សាភិបាលគ្រប់គ្រង FIFA ចូលរួមបានបញ្ជាក់ជាថ្មីនូវការគាំទ្រពេញលេញរបស់ពួកគេចំពោះប្រធាន FIFA លោក Gianni Infantino។
ជាថ្នូរវិញ ប្រធាន FIFA បានបញ្ជាក់ជាថ្មីនូវការគាំទ្រពេញលេញរបស់លោកចំពោះអគ្គលេខាធិការ FIFA និងរដ្ឋបាល FIFA ចំពោះការងារចាំបាច់ និងលេចធ្លោរបស់ពួកគេក្នុងការសម្រេចចក្ខុវិស័យរបស់លោក។
នេះបើយោងតាមប្រភពពីរ បានប្រាប់ Reuters ថា លោក Mattias Grafstrom អគ្គលេខាធិការបានផ្ញើលិខិតផ្ទៃក្នុង មួយទៅកាន់បុគ្គលិកនៅសប្តាហ៍នេះ ដោយសោកស្តាយចំពោះស៊េរី នៃព្រឹត្តិការណ៍ដ៏ក្រៀមក្រំ និងគួរឲ្យបន្ទោសនាំឲ្យគម្រោងនេះត្រូវបាន បោះបង់ចោលជាអចិន្ត្រៃយ៍។
លិខិតរបស់លោក Grafstrom មិនបាននិយាយឈ្មោះលោក Infantino បានកត់សម្គាល់ថា បុគ្គលម្នាក់ៗ គ្រាមិនស្ថិតស្ថេរ និងវគ្គដ៏អកុសលកើតឡើង ហើយបាត់ទៅវិញ ប៉ុន្តែការងាររបស់ FIFA នឹងបន្ត។
ពាក្យសម្ដីរបស់លោកបានបន្លឺឡើងដូចលោក Kevin Lamour ប្រធានផ្នែកប្រតិបត្តិការរបស់ FIFA បាននិយាយកាលពីសប្តាហ៍មុនថា បុគ្គលិកត្រូវបានបោកបញ្ឆោតជុំវិញផែនការ ដែលលោកបានពិពណ៌នាថា ជាគម្រោងរបស់មនុស្សតែម្នាក់។
សេចក្តីថ្លែងការណ៍របស់ FIFA កាលពីថ្ងៃពុធបានកត់សម្គាល់ថា លោក Infantino ជាប្រធានចាប់តាំងពីឆ្នាំ ២០១៦គឺជាមន្ត្រីតែម្នាក់គត់ដែលត្រូវបានជ្រើសរើសដោយសមាគមសមាជិក FIFA ចំនួន ២១១។ FIFA បានបន្តថា លិខិតដាច់ដោយឡែកមួយត្រូវបានផ្ញើទៅកាន់សមាជិកក្រុមប្រឹក្សា FIFA និងសមាគមសមាជិក ដោយសុំទោសចំពោះកំហុស និងសន្យាថានឹងមានការពិនិត្យឡើងវិញ៕
