ព័រទុយហ្គាល់៖យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា កីឡាករ Cristiano Ronaldo និងភរិយាថ្មីរបស់លោក អ្នកនាង Georgina Rodriguez បានចុះហត្ថលេខាលើកិច្ចព្រមព្រៀងមុនរៀបការដែលគ្របដណ្តប់លើការបែងចែកទ្រព្យសម្បត្តិ និងរក្សានាមត្រកូលដើមរបស់ពួកគេ។
នេះបើយោងតាមការចុះផ្សាយរបស់ Jornal de Noticias នៅថ្ងៃទី ១៣ ខែសីហា បាននិយាយថា គូស្នេហ៍ដ៏ល្បីល្បាញនេះបានចុះហត្ថលេខាលើកិច្ចព្រមព្រៀងមុនរៀបការនៅការិយាល័យសារការីមួយ នៅទីក្រុង Lisbon នាថ្ងៃទី ១០ ខែសីហា មួយថ្ងៃមុនពិធីមង្គលការឯកជនរបស់ពួកគេនៅទីក្រុង Cascais ប្រទេសព័រទុយហ្គាល់ ។
ក្រោមកិច្ចព្រមព្រៀងនេះ ភាគីនីមួយៗរក្សាកម្មសិទ្ធិពេញលេញនៃទ្រព្យសម្បត្តិនីមួយៗ ដែលពួកគេមាន ឬរកបានទាំងមុន និងក្រោយរៀបការ។ ទ្រព្យសម្បត្តិថ្មីណាមួយដែលបានទិញរួមគ្នានឹងក្លាយជាទ្រព្យសម្បត្តិរួម។
ឯកសារបានបង្ហាញថា គូស្នេហ៍នេះមិនបានផ្លាស់ប្តូរនាមត្រកូលរបស់ពួកគេបន្ទាប់ពីរៀបការរួចនោះទេ ហើយពួកគេនឹងរក្សាលំនៅដ្ឋានរបស់ពួកគេនៅប្រទេសអារ៉ាប៊ីសាអូឌីត ជាកន្លែងដែលពួកគេបានរស់នៅចាប់តាំងពី Ronaldo បានចូលរួមជាមួយ Al-Nassr ឆ្នាំ ២០២២។
សារព័ត៌មានព័រទុយហ្គាល់បានរាយការណ៍ថា ពិធីមង្គលការបានធ្វើឡើងនៅម៉ោង ១:៣០ រសៀល (ម៉ោងក្នុងស្រុក) នៅផ្ទះឯកជនរបស់គូស្នេហ៍នេះនៅទីក្រុង Cascais ក្នុងចំណោមកូនៗរបស់ពួកគេ។
បញ្ជីភ្ញៀវរួមមានមិត្តភក្តិជិតស្និទ្ធ និងសមាជិកគ្រួសារដូចជា Miguel José ជាមិត្តភក្តិជិតស្និទ្ធ និងជាអតីតមិត្តរួមក្រុមរបស់ Ronaldo មកពី Sporting Lisbon, Ivana ជាប្អូនស្រីរបស់ Georgina Rodriguez និង Jose និង Monica ដែលជាមិត្តភក្តិជិតស្និទ្ធរបស់ Rodriguez មកពីឧស្សាហកម្មគ្រឿងអលង្ការ។
យោងតាម Daily Mail បានឲ្យដឹងថា លោក Ronaldo បានវិលត្រឡប់មកហ្វឹកហាត់ជាមួយ Al-Nassr រួចហើយ ដើម្បីត្រៀមខ្លួនសម្រាប់រដូវកាល Saudi Pro League ថ្មី។ នាថ្ងៃទី ១៣ ខែសីហា លោកបានទាក់ទាញចំណាប់អារម្មណ៍នៅទីលានហ្វឹកហាត់ដោយបង្ហាញម៉ូដសក់ខ្លី និងសក់ពណ៌ទង់ដែងក្រហម។
ភរិយារបស់លោកបន្តគ្រប់គ្រងអាជីវកម្មផ្សេងៗរបស់នាង រួមជាមួយនឹងការមើលថែកូនៗរបស់ពួកគេ។ ថ្មីៗនេះ នាងបានបង្ហោះខ្លឹមសារជាញឹកញាប់នៅលើបណ្តាញសង្គម Instagram របស់នាង ដើម្បីផ្សព្វផ្សាយម៉ាកម៉ូដដែលនាងបានបង្កើត។
នេះបើយោងតាម Forbes បាននិយាយថា លោក Ronaldo អាយុ ៤១ ឆ្នាំ គឺជាអត្តពលិកដ៏ល្បីល្បាញ និងជោគជ័យបំផុតម្នាក់របស់ពិភពលោក។ លោកបានឈរនៅលំដាប់កំពូលនៃបញ្ជីអត្តពលិកដែលមានប្រាក់ខែខ្ពស់បំផុតរបស់ពិភពលោកនៅឆ្នាំនេះ ដោយមានទ្រព្យសម្បត្តិសុទ្ធប្រមាណ ១.២ ពាន់លានដុល្លារ៕
