អន្តរជាតិ៖ ការប្រគំតន្ត្រីបែប «Residency» ដែលសិល្បករសម្តែងជាបន្តបន្ទាប់នៅទីតាំងតែមួយ កំពុងក្លាយជានិន្នាការដ៏ពេញនិយមក្នុងវិស័យតន្ត្រី ខណៈវាមិនត្រឹមតែបង្កើនប្រាក់ចំណូលសម្រាប់សិល្បករ និងអ្នករៀបចំកម្មវិធីប៉ុណ្ណោះទេ ប៉ុន្តែថែមទាំងជំរុញវិស័យទេសចរណ៍ នៅទីក្រុងដែលជាម្ចាស់ផ្ទះរៀបចំកម្មវីធីផងដែរ។
តាមការចេញផ្សាយពីសារព័ត៌មាន The Hollywood Reporter បានអោយដឹងថា តារាចម្រៀង Bad Bunny បានបង្ហាញពីឥទ្ធិពលនេះតាមរយៈការសម្តែងនៅព័រតូរីកូ ដែលបានទាក់ទាញអ្នកគាំទ្រពីតំបន់ផ្សេងៗឱ្យធ្វើដំណើរទៅចូលរួម និងបង្កើតផលប្រយោជន៍សេដ្ឋកិច្ចយ៉ាងច្រើនសម្រាប់តំបន់។
ជាមួយគ្នានេះ តារាចម្រៀងល្បីៗដូចជា Celine Dion, Sam Smith និង Backstreet Boys ក៏កំពុងជ្រើសរើសទីក្រុងដែលមានទំនាក់ទំនងពិសេសជាមួយអាជីព និងប្រវត្តិសាស្ត្ររបស់ពួកគេ សម្រាប់ការសម្តែងបែប Residency។ ការផ្លាស់ប្តូរនេះបង្ហាញថា Residency មិនត្រូវបានកំណត់ត្រឹមទីក្រុង Las Vegas ទៀតឡើយ។
និន្នាការនេះក៏កំពុងជំរុញការធ្វើដំណើររបស់អ្នកគាំទ្រដើម្បីចូលរួមការប្រគំតន្ត្រីនៅក្រៅទីក្រុង ឬប្រទេសរបស់ខ្លួន ដែលត្រូវបានគេហៅថា «Gig-tripping»។ អ្នកជំនាញមើលឃើញថា ការភ្ជាប់រវាងតន្ត្រី ការកម្សាន្ត និងទេសចរណ៍ អាចក្លាយជាផ្នែកសំខាន់មួយនៃអនាគតឧស្សាហកម្មតន្ត្រីពិភពលោក។
ប្រែសម្រួល៖ គីរី
