ទួរគី៖យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ក្លឹបបាល់ទាត់ Turgutluspor បានបង្កើតប្រវត្តិសាស្ត្រថ្មីមួយក្នុងវិស័យបាល់ទាត់ របស់ប្រទេសទួរគី ដោយបានតែងតាំងស្ត្រីវ័យ ២២ ឆ្នាំម្នាក់ជាអ្នកចាត់ការថ្មី សម្រាប់ក្រុមបាល់ទាត់ បុរសរបស់ខ្លួនទៅវិញ។
ក្លឹបនេះ បច្ចុប្បន្នកំពុងប្រកួតប្រជែងក្នុងព្រឹត្តិការណ៍ ការប្រកួតកីឡាបាល់ទាត់លីគកម្រិតទី ៦ របស់ប្រទេសទួរគី បានប្រកាសជាផ្លូវការអំពីការ សម្រេចចិត្តនេះ ព្រមទាំងបានជូនពរឲ្យអ្នកចាត់ការវ័យ ក្មេងរូបនេះទទួលបានជោគជ័យ ក្នុងតួនាទីថ្មីរបស់នាង។
ក្លឹប Turgutluspor បានបញ្ជាក់ថា ក្លឹបរបស់យើង បានសម្រេចកិច្ចព្រមព្រៀងជាមួយ នាង Zeynep Mestan សម្រាប់តួនាទីជាគ្រូបង្វឹក ដោយស្របទៅតាមរចនាសម្ព័ន្ធ និងគោលដៅសម្រាប់រដូវកាលថ្មី។
យោងតាមសារព័ត៌មាន The Sun បាននិយាយថា នាង Mestan មិនមែនជាមនុស្សចម្លែកទេក្នុងវិស័យបាល់ទាត់ទួរគី។ មុនពេលងាកមកចាប់អាជីពជាគ្រូបង្វឹក នាងធ្លាប់លេងឲ្យក្រុមនារីជាច្រើនក្នុងតំបន់ Izmir និង Manisa។ នាងបានចាប់ផ្តើមអាជីពអាជីពរបស់នាងនៅឆ្នាំ ២០១៩ ជាមួយក្លឹប Karsiyaka BES Spor។
ក្លឹបចុងក្រោយដែលនាងបានលេងឲ្យគឺ Bornova Genc Yildizlar Spor នៅឆ្នាំ ២០២៥ ឥឡូវនេះ ត្រឹមតែ ៦ សប្តាហ៍ប៉ុណ្ណោះ បន្ទាប់ពីមានអាយុ ២២ ឆ្នាំ Mestan បានធ្វើការផ្លាស់ប្តូរអាជីពដ៏គួរឱ្យកត់សម្គាល់មួយ ដោយក្លាយជាស្ត្រីដំបូងគេដែលដឹកនាំក្រុមបុរសរបស់ក្លឹប Turgutluspor។
គ្រូបង្វឹកវ័យក្មេងរូបនេះកំពុងប្រឈមមុខនឹងបញ្ហាប្រឈមដ៏ធំមួយនៅខាងមុខ។ Turgutluspor កំពុងឆ្លងកាត់ដំណាក់កាលដ៏លំបាកមួយ ដោយថ្មីៗនេះពួកគេត្រូវបានកាត់ចេញទៅលេងនៅលីគកម្រិតទី ៦ នៃបាល់ទាត់ទួរគី។ នៅរដូវកាលមុន ក្រុមនេះបានធ្លាក់ចេញពីលីគ (relegation) បន្ទាប់ពីបញ្ចប់ក្នុងចំណាត់ថ្នាក់ទី ១០ ក្នុងលីគ Bolgesel Amator Lig។ នេះគឺជាការធ្លាក់ចេញពីលីគជាលើកទី ២ ជាប់ៗគ្នាសម្រាប់ក្លឹបនេះ បន្ទាប់ពីពួកគេបានធ្លាក់ចេញពីលីគ TFF 3. Lig ក្នុងរដូវកាល ២០២៤-២០២៥។
នាង Mestan នឹងចាប់ផ្តើមជំពូកថ្មីនៃអាជីពរបស់នាង នៅពេលដែលរដូវកាលថ្មីចាប់ផ្តើមនៅខែតុលា។ ទោះបីជាការមកដល់របស់គ្រូបង្វឹកស្ត្រីវ័យ ២២ ឆ្នាំរូបនេះប្រាកដជានឹងទាក់ទាញការចាប់អារម្មណ៍ក៏ដោយ ក៏លទ្ធផលនៃការប្រកួតនៅលើទីលាននឹងក្លាយជាកត្តាវាស់វែងដ៏សំខាន់បំផុតសម្រាប់ទិសដៅថ្មីដ៏ក្លាហានរបស់ក្លឹប Turgutluspor៕
