បរទេស៖ តារាសម្ដែងស្រី Saoirse Ronan បានចេញមុខបកស្រាយជុំវិញ ពាក្យចចាមអារ៉ាមដែលថា ស្វាមីរបស់នាងគឺលោក Jack Lowden ត្រូវបានគេជ្រើសរើសឱ្យសម្ដែងជាតួអង្គ James Bond បន្ទាប់ពីតារាសម្ដែង Gary Oldman បានលើកឡើងថាមិត្តរួមការងារក្នុងរឿង Slow Horses រូបនេះ អាចមានឈ្មោះក្នុង “បញ្ជីសម្រាំង (Shortlist)” ចុងក្រោយ។
ថ្លែងប្រាប់ទីភ្នាក់ងារសារព័ត៌មាន Associated Press អ្នកនាង Ronan បានបញ្ជាក់ថា លោក Oldman “គិតថា [Lowden] គឺជា James Bond” ប៉ុន្តែនាងមិនបានបង្ហើបថាតើការសន្និដ្ឋាននេះជាការពិតឬយ៉ាងណានោះទេ។
តារាស្រីម្ចាស់ពានរង្វាន់ Golden Globe រូបនេះបានបន្តថា៖ “រឿងនេះវាជារឿងដោយឡែក។ និយាយដោយស្មោះត្រង់ទៅ ពួកយើងកំពុងតែបន្តរស់នៅតាមធម្មតា ហើយមានរឿងជាច្រើនទៀតដែលត្រូវដោះស្រាយ។ ដូច្នេះ វាពិតជាមិនមែនជាប្រធានបទដែលយើងតែងតែលើកយកមកនិយាយនៅក្នុងផ្ទះនោះទេ។ ការបណ្ដើរឆ្កែដើរលេង ការរៀបចំអាហារពេលល្ងាច គឺជាអ្វីដែលពួកយើងកំពុងតែផ្តោតអារម្មណ៍ជាងគេ”។ អ្នកនាងបានបន្ថែមថា បច្ចុប្បន្ន លោក Lowden កំពុង “មានពេលវេលាដ៏ល្អ” ក្នុងការថតភាគថ្មីៗនៃរឿង Slow Horses ដែលកំពុងចាក់ផ្សាយរដូវកាលទី ៦ នៅលើ Apple TV។
កាលពីខែកញ្ញា លោក Oldman បានទម្លាយថា លោក Lowden ស្ថិតក្នុងចំណោមអ្នកដែលត្រូវបានគេលេចឮថានឹងមកស្នងតំណែងជាភ្នាក់ងារសម្ងាត់អង់គ្លេសនេះ បន្ទាប់ពីលោក Daniel Craig បានចាកចេញពីសាច់រឿង Bond ក្នុងឆ្នាំ ២០២១។ លោកបានប្រាប់កម្មវិធី The Morning Show របស់កាណាដាថា៖ “មានពាក្យចចាមអារ៉ាមថាគាត់ស្ថិតក្នុងបញ្ជីសម្រាំង… ពួកគេបានជ្រើសរើសរួចហើយ គ្រាន់តែមិនទាន់ប្រកាសផ្លូវការ។ ដូច្នេះខ្ញុំសង្ឃឹមថាវាជា Jack”។
យ៉ាងណាមិញ ក្រោយមក លោកបានចេញមុខបញ្ជាក់ឡើងវិញ ក្នុងកិច្ចពិភាក្សា Visionaries នៅមហោស្រពភាពយន្តអន្តរជាតិ Toronto កាលពីថ្ងៃទី១០ ខែកញ្ញា ថាលោកគ្រាន់តែដឹងអំពីបញ្ជីសម្រាំងដែលមានបេក្ខភាព ៦ នាក់ ប៉ុន្តែលោកមិនដឹងច្បាស់ថាតួឯកណាម្នាក់នឹងត្រូវដើរតួជា 007 នោះទេ ដោយលោកបញ្ជាក់ថា៖ “ទោះបីជាខ្ញុំដឹង… ខ្ញុំក៏រៀនសូត្រពីកំហុសដែរ គឺខ្ញុំនឹងមិនហើបមាត់នោះទេ។ ខ្ញុំមិនដឹងថាជានរណាទេ ខ្ញុំគ្រាន់តែសង្ឃឹមថាជា Jack”។
គួរជម្រាបផងដែរថា លោក Denis Villeneuve ត្រូវបានចាត់តាំងឱ្យដឹកនាំរឿង Bond វគ្គថ្មីនេះ ដែលនឹងក្លាយជាភាពយន្តដំបូងពីផលិតកម្ម Amazon MGM បន្ទាប់ពីស្ទូឌីយោទទួលបានសិទ្ធិគ្រប់គ្រងពេញលេញលើតួអង្គ និងកម្មសិទ្ធិបញ្ញាកាលពីខែកុម្ភៈ ឆ្នាំ ២០២៥។ ចំណែកឯលោក Steven Knight ដែលជាអ្នកនិពន្ធរឿង Peaky Blinders កំពុងទទួលបន្ទុកសរសេរអត្ថបទសាច់រឿង។
មកទល់ពេលនេះ មានតារាសម្ដែងល្បីៗជាច្រើនត្រូវបានគេលេចឮថានឹងក្លាយជាតួ James Bond បន្ទាប់ ដែលក្នុងនោះរួមមាន Callum Turner, Jacob Elordi, Tom Holland, Aaron Taylor-Johnson, Harris Dickinson និងលោក Lowden ប៉ុន្តែក្រុមហ៊ុន Amazon មិនទាន់មានការប្រកាសផ្លូវការណាមួយអំពីការសម្រេចចិត្តជ្រើសរើសតួអង្គនៅឡើយទេ។
ប្រែសម្រួល៖ គីរី
