បរទេស៖ ភាពយន្តឯកសារ Always Lalisa ដែលបង្ហាញពីទិដ្ឋភាពក្រៅឆាក របស់តារាចម្រៀងប៉ុបលំដាប់ពិភពលោក Lisa ដឹកនាំរឿងដោយអ្នកស្រី Sue Kim នឹងអាចទស្សនាបានក្នុងពេលឆាប់ៗនេះនៅលើ YouTube Premium នេះបើយោងតាមការចុះផ្សាយផ្តាច់មុខរបស់សារព័ត៌មាន The Hollywood Reporter ។
ភាពយន្តឯកសារដែលផលិត ដោយផលិតកម្ម Sony Music Vision នេះ ត្រូវបានចាក់បញ្ចាំងជាលើកដំបូង នៅមហោស្រពភាពយន្តអន្តរជាតិ តូរ៉ុនតូ (Toronto International Film Festival) កាលពីខែកញ្ញា និងបានចាក់បញ្ចាំងក្នុងកម្រិតកំណត់នៅតាមរោងភាពយន្តកាលពីខែមុន។ លោក Lyor Cohen ប្រធានផ្នែកតន្ត្រីសកលរបស់ YouTube បានប្រាប់ THR ថា ការសម្រេចចិត្តនាំយកភាពយន្តឯកសារនេះ មកកាន់ផ្លែតហ្វមរបស់ខ្លួន គឺជាការសម្រេចចិត្តដ៏ងាយស្រួលបំផុត ដោយសារតែយុទ្ធសាស្ត្រផ្តោត លើភាពជាសកលរបស់ផ្លែតហ្វមនេះ។
Lisa បានប្រាប់ THR តាមរយៈទូរស័ព្ទអំឡុង ពេលហាត់សមថា៖ “YouTube គឺជាផ្នែកមួយដ៏ធំនៃដំណើររបស់ខ្ញុំ តាំងពីដើមដំបូងមកម្ល៉េះ។” តារាចម្រៀងលំដាប់ពិភពលោក និងជាសមាជិកក្រុមចម្រៀងនារី Blackpink រូបនេះបន្តទៀតថា៖
“ចាប់តាំងពីការចែករំលែកវីដេអូចម្រៀង (Music Videos) រហូតដល់ការផ្សាយផ្ទាល់ការសម្តែងរបស់ខ្ញុំនៅ Coachella វាបានជួយខ្ញុំឱ្យឈានទៅដល់អ្នកគាំទ្រជុំវិញពិភពលោក ដូច្នេះវាជារឿងដ៏ត្រឹមត្រូវសម្រាប់ខ្ញុំក្នុងការចែករំលែកភាពយន្តឯកសាររបស់ខ្ញុំនៅលើ YouTube។”
ភាពយន្តនេះនឹងមានវត្តមាននៅលើផ្លែតហ្វមវីដេអូមួយនេះនៅថ្ងៃទី ១៨ ខែវិច្ឆិកា ហើយនឹងមានសម្រាប់តែសមាជិក Premium ប៉ុណ្ណោះ។ តារាចម្រៀង និងរ៉េបវ័យ ២៩ ឆ្នាំរូបនេះ ក៏នឹងបញ្ចេញបទចម្រៀងថ្មីមួយដែលមានចំណងជើងថា “Leave With Me” នៅថ្ងៃទី ១៨ វិច្ឆិកា ផងដែរ។ បទចម្រៀងនេះត្រូវបានបង្កើតឡើងសម្រាប់ និងដាក់បញ្ចូលក្នុងភាពយន្តឯកសារនេះផ្ទាល់តែម្តង។
Lisa បានប្រាប់ THR អំពីអារម្មណ៍រំភើបដែលអ្នកគាំទ្រអាចទស្សនាភាពយន្តនេះនៅផ្ទះថា៖ “ខ្ញុំពិតជារំភើបណាស់។ ខ្ញុំ និងម្តាយរបស់ខ្ញុំបានទៅរោងកុនដើម្បីទស្សនាភាពយន្តនេះ ប៉ុន្តែពួកយើងក៏បាននិយាយដែរថា ‘អូ! យើងស្ទើរតែមិនអាចរង់ចាំឱ្យភាពយន្តនេះចេញនៅលើ YouTube បានទេ ដើម្បីយើងអាចមើលវាឡើងវិញបានដោយមិនឈប់’។”
តារាចម្រៀងរូបនេះបាននិយាយថា ការគាំទ្រចំពោះភាពយន្តឯកសារនេះពីសំណាក់មនុស្សជុំវិញខ្លួននាងពិតជាអស្ចារ្យណាស់។ សូម្បីតែមិត្តភក្តិជិតស្និទ្ធបំផុតរបស់នាងមួយចំនួនក៏បានប្រាប់នាងដែរថា ភាពយន្តនេះបានជួយពួកគេឱ្យស្វែងយល់បន្ថែមអំពីនាង ដោយបានដឹងពីការលំបាកមួយចំនួនដែលនាងត្រូវជម្នះតាមរយៈខ្សែភាពយន្តនេះ ខណៈដែលកន្លងមកនាងតែងតែបង្ហាញភាពរឹងមាំចំពោះអ្នកជុំវិញខ្លួនជានិច្ច។
ថ្មីៗនេះ Lisa ទើបតែបានចេញផ្សាយអាល់ប៊ុមខ្នាតតូច (EP) ដែលមានចំណងជើងថា Press Play កាលពីខែតុលា ដោយនាំមុខដោយបទចម្រៀងចេញមុន “SaWaDiKa”។ ចាប់តាំងពីអាល់ប៊ុមនោះចេញផ្សាយមក តារាចម្រៀងរូបនេះមានភាពមមាញឹកយ៉ាងខ្លាំងក្នុងការត្រៀមខ្លួនសម្រាប់ការសម្តែងប្រចាំការ (Residency) នៅទីក្រុង Las Vegas របស់នាង ដែលនឹងចាប់ផ្តើមនៅថ្ងៃព្រហស្បតិ៍ (ទី ១២ វិច្ឆិកា) នៅសាលប្រគុំតន្ត្រី The Colosseum ក្នុងសណ្ឋាគារ Caesars Palace។ តារាចម្រៀងរូបនេះបានបង្ហាញក្តីរំភើប និងការភ័យអរខ្លះៗចំពោះសមិទ្ធផលនេះ ដោយសារនាងនឹងក្លាយជាតារា K-pop ដំបូងគេដែលមានការសម្តែងប្រចាំការនៅ Las Vegas។
ទីតាំងប្រគុំតន្ត្រីដែលមានកៅអីជាង ៤,០០០ នេះ គឺមានលក្ខណៈកក់ក្តៅ និងជិតស្និទ្ធសម្រាប់តារាចម្រៀងរូបនេះ ដែលធ្លាប់តែសម្តែងនៅកីឡដ្ឋាន សាលធំៗ និងព្រឹត្តិការណ៍ដែលមានអ្នកទស្សនាច្រើន។ នាងបានបន្ថែមថា៖ “អ្នកអាចមើលឃើញមុខអ្នកគ្រប់គ្នាយ៉ាងជិត។ ខ្ញុំដឹងថាពួកគេនឹងនៅកៀកខ្ញុំខ្លាំង ដូច្នេះខ្ញុំសង្ឃឹមថាខ្ញុំអាចមើលភ្នែកអ្នកគ្រប់គ្នាបានដោយផ្ទាល់។”
ប្រែសម្រួល៖ គីរី
