សេអ៊ូល៖ ក្រុមហ៊ុនបច្ចេកវិទ្យាយក្សកូរ៉េខាងត្បូង Samsung Electronics បាននិយាយថា ប្រាក់ចំណេញប្រតិបត្តិការរបស់ខ្លួន បានកើនឡើង ៥៣.៣ ភាគរយនៅក្នុងត្រីមាសទី ៤ ឆ្នាំ ២0២១ ខណៈការលក់កំណត់ត្រា បានជួយយកឈ្នះ លើបញ្ហាប្រឈម នៃខ្សែសង្វាក់ផ្គត់ផ្គង់ ដែលបណ្តាលមកពីជំងឺរាតត្បាត យោងតាមការចេញផ្សាយ ពីគេហទំព័រជប៉ុនធូដេ។
ក្រុមហ៊ុនផលិតស្មាតហ្វូនដ៏ធំបំផុត របស់ពិភពលោកបាននិយាយថា ប្រាក់ចំណេញប្រតិបត្តិការរបស់ខ្លួន បានកើនឡើងដល់ ១៣.៨៧ ពាន់ពាន់លានវ៉ុន (១១.៥៥ ពាន់លានដុល្លារ) សម្រាប់រយៈពេលខែតុលា ដល់ខែធ្នូក្នុងឆ្នាំ២0២១ កើនឡើងពី៩ពាន់ពាន់លានវ៉ុន ក្នុងត្រីមាសដូចគ្នាកាលពីឆ្នាំមុន។ ក្រុមហ៊ុនបាននិយាយលើឯកសារបទប្បញ្ញត្តិថា ចំពោះតម្លៃបន្ទះឈីបអង្គចងចាំខ្ពស់ និងតម្រូវការអ្នកប្រើប្រាស់ខ្លាំង Samsung មានការលក់ប្រចាំឆ្នាំខ្ពស់បំផុត របស់ខ្លួនចំនួន ២៧៩.៦ពាន់ពាន់លានវ៉ុន ក្នុងឆ្នាំ២0២១ ជាការកើនឡើង១៨ ភាគរយ ធៀបនឹងឆ្នាំមុន។
ក្រុមហ៊ុនបច្ចេកវិទ្យាយក្សមួយនេះ បាននិយាយនៅក្នុងសេចក្តីថ្លែងការណ៍មួយថា Samsung សម្រេចបានការលក់កំណត់ត្រា ចំពោះផលិតផលប្រកួតប្រជែង បើទោះបីជានៅតែបន្តភាព មិនប្រាកដប្រជាក៏ដោយ ហើយបានបង្ហាញពីតម្រូវការដ៏រឹងមាំ សម្រាប់ស្មាតហ្វូនថ្នាក់កំពូលរបស់ខ្លួន។ ជំងឺរាតត្បាត COVID-19 បានធ្វើឲ្យមានការបំផ្លិចបំផ្លាញ ដល់សេដ្ឋកិច្ចពិភពលោក វាបានជួយឲ្យក្រុមហ៊ុន បច្ចេកវិទ្យាជាច្រើនរីកចម្រើន។
ការងារពីផ្ទះដែលជំរុញដោយជំងឺរាតត្បាត បានជំរុញឲ្យមានតម្រូវការ សម្រាប់ឧបករណ៍ដំណើរការ ដោយបន្ទះឈីបរបស់ក្រុមហ៊ុន Samsung ក៏ដូចជាឧបករណ៍ប្រើប្រាស់ ក្នុងផ្ទះដូចជាទូរទស្សន៍ និងម៉ាស៊ីនបោកគក់ជាដើម។ក្រុមហ៊ុន Samsung Electronics ជាក្រុមហ៊ុនផលិតបន្ទះឈីប អង្គចងចាំដ៏ធំបំផុត របស់ពិភពលោក បានបង្កើនការវិនិយោគ យ៉ាងសកម្មនៅក្នុង អាជីវកម្មសារធាតុដើម របស់ខ្លួន ខណៈពិភពលោកបានប្រយុទ្ធប្រឆាំង នឹងការខ្វះខាតបន្ទះឈីប ដែលបានវាយប្រហារ គ្រប់បែបយ៉ាងតាំងពីរថយន្ត និងឧបករណ៍ប្រើប្រាស់ក្នុងផ្ទះ រហូតដល់ស្មាតហ្វូន និងឧបករណ៍លេងហ្គេម៕ ដោយ៖លី ភីលីព
