គៀវ៖ រដ្ឋមន្ត្រីការបរទេសឡាតវី ដែលជាសមាជិកនៃ សម្ព័ន្ធមិត្តយោធាណាតូ បានរកឃើញពីលទ្ធភាពដែលអ៊ុយក្រែន វាយប្រហារលើគោលដៅយោធាក្នុងប្រទេសរុស្ស៊ី នេះបើយោងតាមការចុះផ្សាយ របស់ទីភ្នាក់ងារសារព័ត៌មាន Newsweek។
លោក Edgars Rinkēvičs រដ្ឋមន្ត្រីការបរទេសរបស់ប្រទេសឡាតវី បានប្រាប់គេហទំព័រ Bloomberg ថាអ៊ុយក្រែន គួរតែត្រូវបានអនុញ្ញាតឱ្យបើកការ វាយប្រហារលើទីតាំងយោធា នៅក្នុងប្រទេសរុស្ស៊ី ដើម្បីការពារការវាយប្រហារលើ ហេដ្ឋារចនាសម្ព័ន្ធដ៏សំខាន់របស់ខ្លួន។
លោក Rinkēvičs បានប្រាប់សារព័ត៌មានកាលពីថ្ងៃទី១៩ ខែវិច្ឆិកា នៅខាងក្រៅកិច្ចប្រជុំរដ្ឋមន្ត្រីការបរទេសណាតូ នៅទីក្រុង Bucharest ប្រទេសរ៉ូម៉ានីថា “យើងគួរតែអនុញ្ញាតឱ្យប្រជាជនអ៊ុយក្រែន ប្រើប្រាស់សព្វាវុធ ដើម្បីតម្រង់គោលដៅលើទីតាំងកាំជ្រួច ឬទីវាលយន្តហោះពីកន្លែង ដែលប្រតិបត្តិការទាំងនោះកំពុងត្រូវបានចាប់ផ្តើម”។
រដ្ឋមន្ត្រីការបរទេសរូបនេះ បាននិយាយសំដៅទៅលើ ការទម្លាក់គ្រាប់បែកនៃការ វាយប្រហារដោយកាំជ្រួចរបស់រុស្ស៊ី ទៅលើហេដ្ឋារចនាសម្ព័ន្ធថាមពលសំខាន់ៗ របស់អ៊ុយក្រែនក្នុងខែតុលា និងវិច្ឆិកា ដែលបានបណ្តាលឱ្យមាន ការដាច់ចរន្តអគ្គិសនី និងការដាច់ចរន្តអគ្គិសនីនៅទូទាំងប្រទេស។
លោក Alexey Chepa សមាជិកសភា Duma នៃរដ្ឋរុស្ស៊ីបានលើកឡើងថា ការវាយប្រហារទ្រង់ទ្រាយធំ ត្រូវបានចាប់ផ្តើមដោយ ប្រធានាធិបតីរុស្ស៊ីលោក វ្លាឌីមៀ ពូទីន ដែលជាផ្នែកមួយនៃ “វិធានការសងសឹក” បន្ទាប់ពីការផ្ទុះនៅថ្ងៃទី៨ ខែតុលា នៅលើស្ពាន Kerch ទៅកាន់ឧបទ្វីបគ្រីមៀ ៕
ប្រែសម្រួល ឈូក បូរ៉ា
