យេរ៉ូសាឡឹម៖ លោក Yoav Gallant រដ្ឋមន្ត្រីការពារជាតិ អ៊ីស្រាអ៊ែល បានថ្លែងកាលពីថ្ងៃអាទិត្យថា កងទ័ពអ៊ីស្រាអ៊ែល ត្រូវបានដកចេញ ពីភាគខាងត្បូងតំបន់ហ្គាហ្សា ដើម្បីត្រៀមសម្រាប់ប្រតិបត្តិការ ដែលអាចកើតមាននៅទីក្រុង Rafah ។
កាលពីថ្ងៃអាទិត្យ កងកម្លាំងបានចាកចេញពីតំបន់ហ្គាហ្សា ដែលកំពុងរៀបចំសម្រាប់ “បេសកកម្មតាមដាន” លោក Gallant បានឲ្យដឹងនៅក្នុងអំឡុងពេលដំណើរទស្សនកិច្ចនៅឯបញ្ជាការភាគខាងត្បូងនៃកងកម្លាំងការពារអ៊ីស្រាអ៊ែល ហៅកាត់ថា (IDF) ដោយបានបន្ថែមថា “យើងបានឃើញឧទាហរណ៍នៃបេសកកម្មបែបនេះនៅក្នុងមន្ទីរពេទ្យ Shifa ហើយនឹង មើលបេសកកម្មបែបនេះនៅក្នុងតំបន់ Rafah ។
អ៊ីស្រាអ៊ែល បានដកទ័ពជើងគោកទាំងអស់ចេញ ពីតំបន់ហ្គាហ្សាភាគខាងត្បូង លើកលែងតែកងពលតូច Nahal Brigade ដែលនៅកណ្តាលហ្គាហ្សា ដោយបំបែកស្ទ្រីបជាពីរ និងការពារការវិលត្រឡប់ របស់ជនស៊ីវិលពីភាគខាងត្បូង ទៅខាងជើងនៃតំបន់ហ្គាហ្សា។
ជាមួយគ្នានេះដែរ កាលពីល្ងាច ថ្ងៃអាទិត្យ លោក Herzi Halevi អគ្គសេនាធិការ IDF បានប្រាប់នៅពេលធ្វើសន្និសីទ សារព័ត៌មានថា ប្រតិបត្តិការយោធា ប្រឆាំងនឹងក្រុមហាម៉ាស់ គឺនៅឆ្ងាយពីទីបញ្ចប់ ទោះបីជាមានការដកទាហាន ចេញក៏ដោយ៕
ប្រែសម្រួលដោយ៖ ម៉ៅ បុប្ផាករា
