វ៉ាស៊ីនតោន៖ មន្ត្រីការពារជាតិជាន់ខ្ពស់ម្នាក់បានឧ្យដឹងថា មន្ទីរបញ្ចកោណកំពុងមានគម្រោងដកកងទ័ពអាមេរិកប្រហែល ៥០០០ នាក់ចេញពីប្រទេសអាល្លឺម៉ង់។
មន្ត្រីរូបនេះ ដែលបានឧ្យដឹងក្នុងលក្ខខណ្ឌមិនបញ្ចេញឈ្មោះ បានដកស្រង់សម្តីដោយប្រព័ន្ធផ្សព្វផ្សាយអាមេរិកថា ការកត់សម្គាល់ថ្មីៗរបស់អធិការបតីអាល្លឺម៉ង់លោក Friedrich Merz លើសង្គ្រាមរបស់សហរដ្ឋអាមេរិកជាមួយអ៊ីរ៉ង់គឺ “មិនសមរម្យ និងមិនមានប្រយោជន៍”។
កាលពីដើមសប្តាហ៍នេះ លោក Merz បានរិះគន់សហរដ្ឋអាមេរិក ចំពោះការចូលរួមយោធា “គ្មានផែនការ” របស់ខ្លួននៅក្នុងប្រទេសអ៊ីរ៉ង់ ដោយថា សហរដ្ឋអាមេរិក “កំពុងត្រូវបានថ្នាក់ដឹកនាំអ៊ីរ៉ង់ ធ្វេីឧ្យអាម៉ាស់”។
ជាការឆ្លើយតប លោក ត្រាំ បានវាយប្រហារមេដឹកនាំអាល្លឺម៉ង់រូបនេះ ដោយថា លោកមិនដឹងថាលោក កំពុងនិយាយអ្វីទេ ហើយព្រងើយកន្តើយ ចំពោះមហិច្ឆតានុយក្លេអ៊ែររបស់អ៊ីរ៉ង់។
លោក ត្រាំ បានសរសេរនៅលើបណ្តាញសង្គមកាលពីថ្ងៃពុធថា សហរដ្ឋអាមេរិកកំពុងពិចារណាលើការកាត់បន្ថយកងទ័ពនៅក្នុងប្រទេសអាល្លឺម៉ង់ ហើយការសម្រេចចិត្តនឹងត្រូវធ្វើឡើង «ក្នុងរយៈពេលដ៏ខ្លីខាងមុខ»។ លោកក៏បានឧ្យដឹងកាលពីថ្ងៃព្រហស្បតិ៍ថា លោកក៏អាចកាត់បន្ថយវត្តមានយោធាសហរដ្ឋអាមេរិកនៅក្នុងប្រទេសអេស្ប៉ាញ និងអ៊ីតាលីផងដែរ៕
ប្រែសម្រួល ឈូក បូរ៉ា
