ញូវយ៉ក ៖ ការិយាល័យគ្រប់គ្រងទ្រព្យសម្បត្តិបរទេស (OFAC) នៃក្រសួងរតនាគារសហរដ្ឋអាមេរិក នៅថ្ងៃអង្គារ បានចេញអាជ្ញាប័ណ្ណទូទៅ Z និងដាក់ទណ្ឌកម្មថ្មីទាក់ទងនឹងអ៊ីរ៉ង់ ។ អាជ្ញាប័ណ្ណនេះ ដែលមានចំណងជើងថា “ការអនុញ្ញាតឱ្យមានសកម្មភាព កាត់បន្ថយ ប្រតិបត្តិការសុវត្ថិភាព និងបរិស្ថានមានកំណត់ និងការផ្ទេរទំនិញ ដែលពាក់ព័ន្ធនឹងមនុស្ស ឬនាវាមួយចំនួន ដែលត្រូវបានរារាំង នៅថ្ងៃទី១៤ ខែកក្កដា ឆ្នាំ២០២៦” ត្រូវបានចុះហត្ថលេខា ដោយលោកស្រី Lisa Palluconi អនុប្រធាន OFAC។
វាមិនអនុញ្ញាតឱ្យមានការចូលទៅក្នុង កិច្ចសន្យាពាណិជ្ជកម្មថ្មីណាមួយ ដែលពាក់ព័ន្ធនឹងទ្រព្យសម្បត្តិ ឬផលប្រយោជន៍ នៅក្នុងទ្រព្យសម្បត្តិ របស់បុគ្គលណាមួយដែលត្រូវបានរារាំងនោះទេ ហើយក៏មិនអនុញ្ញាត ឱ្យមានប្រតិបត្តិការ ឬសកម្មភាពណាមួយ ដែលត្រូវបានហាមឃាត់ដោយបទបញ្ជាប្រតិបត្តិ ដែលមានចំណងជើងថា “ការដាក់ទណ្ឌកម្មទាក់ទងនឹងវិស័យបន្ថែមរបស់អ៊ីរ៉ង់” ដែលបានចុះហត្ថលេខានៅថ្ងៃទី១០ ខែមករា ឆ្នាំ២០២០ រួមទាំងប្រតិបត្តិការ ឬសកម្មភាព ណាមួយដែលពាក់ព័ន្ធនឹងអ៊ីរ៉ង់ រដ្ឋាភិបាលអ៊ីរ៉ង់ ឬទំនិញ ឬសេវាកម្មដើមកំណើតអ៊ីរ៉ង់ ដែលត្រូវបានហាមឃាត់ដោយបទប្បញ្ញត្តិប្រតិបត្តិការ និងទណ្ឌកម្មរបស់អ៊ីរ៉ង់។
លើសពីនេះ OFAC បានបន្ថែមបុគ្គលចំនួន ១០ នាក់ អង្គភាពចំនួន ២៤ និងនាវាចំនួន ២០ គ្រឿងទៅក្នុងបញ្ជីជនជាតិ និងបុគ្គលដែលត្រូវបានរារាំងជាពិសេស ដោយសារតែទំនាក់ទំនងរបស់ពួកគេជាមួយអ៊ីរ៉ង់។ ប្រធានាធិបតីអាមេរិក លោក ដូណាល់ ត្រាំ បានព្រមានថា សហរដ្ឋអាមេរិកនឹងពង្រីកការវាយប្រហាររបស់ខ្លួនលើអ៊ីរ៉ង់ ដើម្បីផ្តោតលើរោងចក្រថាមពល និងស្ពាននៅសប្តាហ៍ក្រោយ លុះត្រាតែទីក្រុងតេអេរ៉ង់ យល់ព្រមចរចា។
លោក ត្រាំ បានឲ្យដឹងនៅក្នុងបទសម្ភាសន៍ជាមួយ Fox News ថា “សប្តាហ៍ក្រោយ វាពិតជាអាក្រក់សម្រាប់ពួកគេ ពីព្រោះសប្តាហ៍ក្រោយនឹង មកដល់រោងចក្រថាមពល ហើយសប្តាហ៍ក្រោយនឹងមកដល់ស្ពាន យើងនឹងវាយកម្ទេចរោង ចក្រថាមពលទាំងអស់របស់ពួកគេ។ យើងនឹងវាយកម្ទេចស្ពានទាំងអស់របស់ពួកគេ លុះត្រាតែពួកគេមកចរចា”។
ប្រធានាធិបតីអាមេរិករូបនេះ បានលើកឡើងថា យោធាអ៊ីរ៉ង់ ត្រូវបាន “បន្ទាបបន្ថោកដល់កម្រិតទាបបំផុត” បន្ទាប់ពីការវាយប្រហារម្តងហើយម្តងទៀតរបស់សហរដ្ឋអាមេរិក ហើយការវាយប្រហារនឹងបន្ត “រហូតដល់ខ្ញុំនិយាយថា វាគ្រប់គ្រាន់ហើយ”។ ទន្ទឹមនឹងនេះ លោក ត្រាំ បានប្រាប់ Fox News ថា តំណាងរបស់លោកបានទាក់ទង ជាមួយមន្ត្រីអ៊ីរ៉ង់ថ្មីៗនេះ។
នៅពេលសួរថា សារអ្វីដែលត្រូវបានផ្ញើទៅកាន់អ៊ីរ៉ង់ លោក ត្រាំ បានឲ្យដឹងថា “អ្នកគួរតែធ្វើកិច្ចព្រមព្រៀង។ អ្នកនឹងមិនមានអ្វី នៅសល់ទេ” ។ ការកត់សម្គាល់របស់លោក បានកើតឡើងចំពេលមានការ កើនឡើងនៃជម្លោះ ចុងក្រោយរវាងសហរដ្ឋអាមេរិក និងអ៊ីរ៉ង់។
គួរបញ្ជាក់ថា នៅថ្ងៃអង្គារ កងកម្លាំង សហរដ្ឋអាមេរិក បានបើកការវាយប្រហារ មួយជុំទៀត ប្រឆាំងនឹងគោលដៅអ៊ីរ៉ង់ សម្រាប់ថ្ងៃទី៤ ជាប់ៗគ្នា និងបានដាក់ចេញនូវការបិទផ្លូវឡើងវិញ នៅក្នុងច្រកសមុទ្រ ហ័រមូស។ បញ្ជាការកណ្តាលសហរដ្ឋអាមេរិកបាននិយាយនៅក្នុងសេចក្តីថ្លែងការណ៍មួយថា “កងកម្លាំងសហរដ្ឋអាមេរិក បានបន្តការបិទផ្លូវកងទ័ពជើងទឹកប្រឆាំងនឹងនាវាដែលធ្វើដំណើរទៅ និងមកពីកំពង់ផែ និងតំបន់ឆ្នេរសមុទ្រអ៊ីរ៉ង់” ៕
