បន្ទាប់ពីបានធ្វើការត្រួតពិនិត្យ រួចរាល់ហើយនោះ កីឡាករខ្សែប្រយុទ្ធបារាំង Karim Benzema ត្រូវបានគេបញ្ជាក់អះអាងថា នឹងត្រូវសម្រាកព្យាបាល របួសយ៉ាងហោចណាស់ រយៈពេលដល់ទៅ៣សប្តាហ៍ ដោយសាររបួសរសៃពួ ដែលគាត់បានទទួល កាលពីប្រកួតថ្ងៃអង្គារមក។
កីឡាករ Benzema បង្ហាញខ្លួនបានតែ២៦នាទីប៉ុណ្ណោះ ក្នុងការប្រកួតឲ្យ Real Madrid ប៉ះនឹងក្រុម Celtic សម្រាប់ពានរង្វាន់ Champions League ហើយក៏ត្រូវបានប្តូរចេញ ជំនួសដោយកីឡាករ Eden Hazard ។
Benzema ដែលកំពុងមានឈ្មោះជាកីឡាករនាំមុខគេ ក្នុងពានរង្វាន់ Ballon d’Or ផងនោះបែរជាទទួលរងរបួស ក្នុងរយៈពេលវែងទៅវិញ ដែលវាកំពុងធ្វើឲ្យកីឡាករមានការព្រួយបារម្ភថា នឹងអាចប៉ះពាល់ដល់ការប្រកួតប្រជែង ពានរង្វាន់ដ៏ធំបំផុត ក្នុងជីវិតរបស់គាត់មួយនេះ ជាមិនខាន។
នៅក្នុងសេចក្តីថ្លែងការណ៍ របស់ក្លឹបបានអះអាងថា ការវិលត្រឡប់របស់ Benzema នឹងមិនអាចកំណត់បាន ច្បាស់លាស់នៅឡើយ ប៉ុន្តែជឿជាក់ថាកីឡាករត្រូវការពេលវេលា យ៉ាងហោចណាស់៣សប្តាហ៍ មុនពេលត្រូវពិនិត្យមើលរបួសនេះឡើងវិញ៕ ប្រែសម្រួល៖ស៊ុនលី
