ប្រធានខេមរសហព័ន្ធយូដូចាស់ នៅបន្តតំណែងដដែល សម្រាប់អាណត្តិថ្មី ២០២១-២០២៥

ភ្នំពេញ៖ លោក ហេង លី ប្រធានខេមរសហព័ន្ធចាស់ នៅតែបន្តជាប់ឆ្នោត ជាប្រធានដដែល ដើម្បីបន្តដឹកនាំក្នុងថានៈជា ប្រធានក្នុងមហាសន្និបាត បញ្ចប់អាណត្តិចាស់ទី៧ ពីឆ្នាំ២០១៧-២០២១ និងបន្តអាណត្តិថ្មីទី៨ ឆ្នាំ២០២១ដល់ឆ្នាំ២០២៥ នៅព្រឹកថ្ងៃទី៥ ខែកុម្ភៈ ឆ្នាំ២០២១ នៅទីស្នាក់ការគណៈកម្មាធិការជាតិ អូឡាំពិកកម្ពុជា ។

លោក ហេង លី ត្រូវសមាជិកនានា បានផ្តល់ការគាំទ្របោះឆ្នោតគាំទ្រដល់លោក ដើម្បីបន្តដឹកនាំជាប្រធានសហព័ន្ធអាណត្តិថ្មី មួយអាណត្តិទៀត ហើយលោកក៏បានបញ្ជាក់ពីឆន្ទៈរបស់ខ្លួន ក្នុងការបន្តអនុវត្តតាមគោលការណ៍ របស់ក្រសួងអប់រំ យុវជន និងកីឡា ដើម្បីបន្តពង្រឹង និងពង្រីកខេមរសហព័ន្ធយូដូ ឲ្យកានតែមានបរិមាណ និងគុណភាព ក្នុងការផលិតធនធានកីឡាករ កីឡាការិនី ក៏ដូចជាពង្រីកក្លិបកីឡាយូដូនានា ឲ្យកាន់តែសម្បូរបែបបន្ថែមទៀត។

សមាសភាពនៃគណៈកម្មាធិការ ប្រតិបត្តិថ្មីដែលមានចំនួន១៣រូប តាមរយៈការអនុម័តផ្តល់សេចក្តីទុកចិត្ត ដោយការលើកដៃ ដែលក្នងនោះលោក ហេង លី ប្រធានអាណត្តិចាស់ទទួលបានការគាំទ្រ ឲ្យបន្តដឹកនាំជាប្រធាន សហព័ន្ធអាណត្តិថ្មី អមដោយអនុប្រធាន លោក ឌៀប វណ្ណឌី លោក នុត ហ៊ួន និងលោក Emmanuel Dias និងអគ្គលេខាធិការ លោក តេង ច័ន្ទគរុរដ្ឋា និងសមាជិកមួយចំនួនទៀត។

សូមបញ្ជាក់ថា មហាសន្និបាតបញ្ចប់អាណត្តិចាស់ និងបន្តអាណត្តិថ្មីនេះ ទទួលបានការចូលរួម ជាសក្ខីភាពពីលោក ទុយ វិច្ឆិកា តំណាងនាយកដ្ឋានអប់រំកាយ និងកីឡានៃក្រសួងអប់រំ យុវជន និងកីឡា និងលោក ឯម ហៀងតំណាង គណៈកម្មាធិការជាតិអូឡាំពិកកម្ពុជាផងដែរ៕ ដោយ៖លី ភីលីព