ចិន៖ របាយការណ៍ថ្មីមួយដោយ Counterpoint Research បានបង្ហាញថា ការលក់ស្មាតហ្វូនរបស់ក្រុមហ៊ុនបច្ចេកវិទ្យាយក្សអាមេរិក Apple ក្នុងប្រទេសចិនបានធ្លាក់ចុះ ១៩ភាគរយនៅត្រីមាសទីមួយនៃឆ្នាំ ២០២៤ ដោយសារតែការកើនឡើងនៃការប្រកួតប្រជែងពីម៉ាកក្នុងស្រុក។
អ្នកស្រាវជ្រាវបាននិយាយកាលពីថ្ងៃអង្គារថា ក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកបានធ្លាក់មកចំណាត់ថ្នាក់លេខ ៣ នៅលើទីផ្សារប្រកួតប្រជែងដ៏ក្តៅគគុកចំពេលមានសម្ពាធពីគូប្រជែងដែលកំពុងកើនឡើងយ៉ាងឆាប់រហ័សរបស់ក្រុមហ៊ុន Huawei ។
នេះបើយោងតាមរបាយការណ៍បាននិយាយថា ក្រុមហ៊ុន Huawei មានមូលដ្ឋាននៅទីក្រុង Shenzhen បានឃើញការលក់ស្មាតហ្វូនរបស់ខ្លួនកើនឡើងយ៉ាងខ្លាំង ៦៩.៧ភាគរយក្នុងត្រីមាសទីមួយ ឥឡូវនេះវាគឺជាក្រុមហ៊ុនផលិតស្មាតហ្វូនធំជាងគេទី ៤ នៅប្រទេសចិន។
ការអនុវត្តដ៏ខ្លាំងរបស់ក្រុមហ៊ុន Huawei កើតឡើង បន្ទាប់ពីការដាក់ទណ្ឌកម្មរបស់សហរដ្ឋអាមេរិក ដែលស្ទើរតែបំផ្លាញអាជីវកម្មស្មាតហ្វូនរបស់ក្រុមហ៊ុនចិនទូទាំងពិភពលោក។ សរុបមក ទីផ្សារស្មាតហ្វូនរបស់ប្រទេសចិនបានពង្រីកប្រហែល ១.៥ភាគរយពីមួយឆ្នាំទៅមួយឆ្នាំនៅត្រីមាសទី១នៃឆ្នាំ ២០២៤ ជាការកត់សម្គាល់ត្រីមាសទី២នៃកំណើនវិជ្ជមានសម្រាប់ឧស្សាហកម្មនេះ។
Vivo បានក្លាយជាអ្នកលក់ស្មាតហ្វូនកំពូលនៅប្រទេសចិនក្នុងអំឡុងត្រីមាសជាមួយនឹងចំណែក ១៧.៤ភាគរយត្រូវបានជំរុញដោយការលក់យ៉ាងខ្លាំងនៃម៉ូដែល Y35 Plus និង Y36 នៅផ្នែកទាប និង S18 នៅផ្នែកពាក់កណ្តាលចុង។ Honor ជាប់ចំណាត់ថ្នាក់លេខ ២ ដែលមានចំណែក ១៦.២ភាគរយតាមពីក្រោយដោយ Apple ដែលមានចំណែក ១៥.៧ភាគរយ៕ ដោយ៖លីភីលីព
