ប៉ារីស ៖ សហព័ន្ធកីឡាបាល់ទាត់ពិភពលោក “FIFA” បាននិយាយកាលពីថ្ងៃពុធថា ខ្លួនកំពុងបើកការស៊ើបអង្កេត លើការស្រែកច្រៀង រើសអើងជាតិសាសន៍ របស់កីឡាករអាហ្សង់ទីន បន្ទាប់ពីពួកគេបានឈ្នះពានរង្វាន់ Copa America កាលពីថ្មីៗនេះ។
អ្នកនាំពាក្យរបស់ស្ថាប័ន គ្រប់គ្រងបាល់ទាត់ពិភពលោក បាននិយាយថា FIFA បានដឹងអំពីវីដេអូ ដែលបានផ្សព្វផ្សាយលើប្រព័ន្ធផ្សព្វផ្សាយសង្គម ហើយសកម្មភាពនេះ កំពុងធ្វើការពិនិត្យមើលហើយ ។ លោកបានបន្ថែមថា FIFA ថ្កោលទោសយ៉ាងខ្លាំង ចំពោះទម្រង់នៃការរើសអើងដោយនរណាម្នាក់ រួមទាំងកីឡាករ អ្នកគាំទ្រ និងមន្ត្រី ។
ការស្រែកច្រៀងនេះ ត្រូវបានគេឮនៅពេលវីដេអូ ផ្សាយផ្ទាល់មួយដែលបានបង្ហោះនៅលើប្រព័ន្ធ ផ្សព្វផ្សាយសង្គមដោយខ្សែបម្រើរបស់ក្លិបបាល់ទាត់ Chelsea និងអាហ្សង់ទីន លោក Enzo Fernandez ចេញពីឡានក្រុងរបស់ក្រុម បន្ទាប់ពីជ័យជម្នះ Copa America លើប្រទេសកូឡុំប៊ីក្នុងទីក្រុង Miami កាលពីថ្ងៃអាទិត្យ ។
កីឡាករមួយចំនួន រួមទាំងកីឡាករ Fernandez វ័យ ២៣ ឆ្នាំបានច្រៀងបទភ្លេងការរំលឹកដល់ការប្រកួតវគ្គផ្តាច់ព្រ័ត្រ World Cup ២០២២ ដែលអាហ្សង់ទីនបានផ្តួលបារាំង។ បទចម្រៀងនេះមានគោលដៅលើខ្សែប្រយុទ្ធឆ្នើមរបស់បារាំង Kylian Mbappe ក្នុងចំណោមអ្នកផ្សេងទៀត ហើយរួមបញ្ចូលការប្រមាថជាតិសាសន៍ និងការប្រមាថភេទដូចគ្នា។
ក្លិប Chelsea បានប្រកាសមុននេះថា ពួកគេបានចាប់ផ្តើមនីតិវិធីដាក់វិន័យផ្ទៃក្នុងប្រឆាំងនឹងកីឡាករFernandez ជុំវិញឧបទ្ទវហេតុនេះ។ ចំណែកកីឡាករ Fernandez បានសុំទោសហើយ ក្លិបបាននិយាយក្នុងសេចក្តីថ្លែងការណ៍មួយថា ខ្លួនបានចាប់ផ្តើមនីតិវិធីវិន័យផ្ទៃក្នុង។
ក្លិបបាល់ទាត់ Chelsea រកឃើញគ្រប់ទម្រង់ នៃអាកប្បកិរិយារើសអើងដែលមិនអាចទទួលយកបានទាំងស្រុង។ យើងទទួលស្គាល់ និងអរគុណ ចំពោះការសុំទោស ជាសាធារណៈរបស់កីឡាកររបស់យើង ហើយនឹងប្រើវាជាឱកាសដើម្បីអប់រំ៕
