ថ្វីត្បិតតែបច្ចុប្បន្ននេះ ក្រុមហ៊ុនជប៉ុន អាមេរិក និងអឺរ៉ុប ពិបាកប្រកួតប្រជែងរថយន្តអគ្គិសនី ជាមួយក្រុមហ៊ុនចិន BYD ក៏ពិតមែន ប៉ុន្តែ BYD បែរជាត្រូវប្រឈមមុខ នឹងក្រុមហ៊ុនចិនដូចគ្នាទៅវិញ ។
កាលពីថ្ងៃទី២៧ ខែសីហា ឆ្នាំ២០២៤ ក្រុមហ៊ុនអគ្គិសនីចិន Xpeng បានបញ្ចេញរថយន្តថ្មីជាម៉ូឌែលលំដាប់ថវិកាដំបូង ក្រោមប្រេនថ្មីរបស់ខ្លួន Mona គឺម៉ូឌែល Mo3 ជាប្រភេទស៊ីដេន។ រថយន្តនេះ ក្លាយជាគូប្រជែងដ៏ស្រួចស្រាលរបស់រថយន្ត BYD ដោយបំពាក់ប្រព័ន្ធជំនួយបើកបរស្វ័យប្រវត្តិ និងមានចម្ងាយបើកបររហូតដល់ជាង ៥០០គីឡូម៉ែត្រក្នុងពេលសាកពេញម្តង ជាពិសេសគឺតម្លៃដ៏ធូរថ្លៃ ត្រឹមតែជាង ១ម៉ឺន ៦ពាន់ដុល្លារ។
លោក He Xiaopeng នាយកប្រតិបត្តិ Xpeng បានបញ្ជាក់ថា រថយន្តថ្មីនេះគឺឆ្លុះបញ្ចាំងពីគោលដៅវែងឆ្ងាយរបស់ក្រុមហ៊ុននៃការផលិតរថយន្តអគ្គិសនីស្វ័យប្រវត្តិ សម្រាប់អតិថិជនដែលមានកម្រិតថវិកា។
លោកបាននិយាយដូច្នេះថា៖ «យើងបានឃើញតម្រូវការខ្លាំងពីអ្នកទិញរថយន្តលើកដំបូង ដែលជាមនុស្សវ័យក្មេង និងមានថវិកាតិចជាង ១០ម៉ឺនយ័ន (១ម៉ឺន ៤ពាន់ដុល្លារ)។ យើងចង់សម្រេចបំណងប្រាថ្នារបស់ពួកគេនូវរថយន្តវៃឆ្លាត ដែលសមល្មមនឹងថវិការបស់ពួកគេ»។
នាពេលខាងមុខ រថយន្ត Mona អាចនឹងត្រូវអភិវឌ្ឍ ទៅជារថយន្តស្វ័យប្រវត្តិពេញលេញ ប៉ុន្តែតម្លៃដដែល ខណៈការអភិវឌ្ឍបច្ចេកវិទ្យា របស់ក្រុមហ៊ុនកាន់តែជឿនលឿនរហ័ស ដែលជួយដល់ផលិតកម្មរបស់ខ្លួន៕
