កូរ៉េខាងត្បូង ៖ យោងតាមការចេញផ្សាយពីគេហទំព័រ koreaboo បានប្រាប់ឲ្យដឹងថា គណនីប្រព័ន្ធផ្សព្វផ្សាយសង្គម បានបង្ហោះវីដេអូ ដែលត្រូវបានចោទប្រកាន់ថា មានការរៀបចំរបស់កំពូល តារាចម្រៀងកូរ៉េខាងត្បូងនាង Jennie សមាជិកក្រុម Blackpink ត្រូវបានផ្អាកបន្ទាប់ពីភ្នាក់ងាររបស់នាង បានប្រកាសពីសកម្មភាពផ្លូវច្បាប់។
គណនីប្រព័ន្ធផ្សព្វផ្សាយសង្គមបានបង្ហោះវីដេអូ ដ៏ពេញនិយមដំបូង បានអះអាងថា បង្ហាញពីសមាជិកក្រុម Blackpink គឺនាង Jennie បង្ហាញផ្នែកនៃរាងកាយរបស់នាងត្រូវបានផ្អាកកាលពីថ្ងៃពុធ មួយថ្ងៃបន្ទាប់ពីភ្នាក់ងាររបស់នាងគឺ OA Entertainment បានប្រកាសពីសកម្មភាពផ្លូវច្បាប់លើខ្លឹមសារត្រូវបានកែសម្រួល និងរៀបចំដោយចេតនាអាក្រក់។
គណនី និងការបង្ហោះទាំងអស់របស់វា រួមទាំងវីដេអូឃ្លីបរបស់នាង Jennie មិនអាចចូលប្រើបានគិតត្រឹមព្រឹកថ្ងៃពុធ។ គណនីនេះបានបង្ហោះវីដេអូនៅថ្ងៃសៅរ៍ ហើយវាបានទាក់ទាញអ្នកចូលមើលជាង ១២.៥ លានដងក្នុងរយៈពេលប្រហែល ១២ ម៉ោង។ វីដេអូឃ្លីបនេះបានរីករាលដាលយ៉ាងឆាប់រហ័សនៅទូទាំងប្រព័ន្ធផ្សព្វផ្សាយសង្គម ជាកន្លែងដែលអ្នកប្រើប្រាស់បានជជែកវែកញែកថាតើវាជាការពិតឬអត់។
OA Entertainment បាននិយាយកាលពីថ្ងៃអង្គារថា យើងទើបតែកំណត់អត្តសញ្ញាណនៃការរីករាលដាលនៃសេចក្តីថ្លែងការណ៍បរិហារកេរ្តិ៍ដែលគ្មានមូលដ្ឋាន និងព័ត៌មានមិនពិត ការកែសម្រួល ឬការរៀបចំដោយចេតនាអាក្រក់នៃរូបថត និងវីដេអូរបស់នាង និងការបង្ហោះ ឬចែកចាយខ្លឹមសារដែលរំលោភលើភាពឯកជន និងសិទ្ធិផ្ទាល់ខ្លួនរបស់នាង។
ដោយសហការជាមួយទីប្រឹក្សាផ្នែកច្បាប់ យើងកំពុងតាមដាន និងប្រមូលភស្តុតាងជាបន្តបន្ទាប់ទាក់ទងនឹងការបង្ហោះ និងគណនីពាក់ព័ន្ធ ខណៈពេលដែលកំពុងបន្តប្តឹងតវ៉ាផ្នែកច្បាប់ស៊ីវិល និងព្រហ្មទណ្ឌប្រឆាំងនឹងការរំលោភបំពានធ្ងន់ធ្ងរ។
ប្រភពផ្នែកច្បាប់បាននិយាយថា ប្រសិនបើម្ចាស់គណនីបានប្រើប្រាស់ AI ដើម្បីផ្លាស់ប្តូរវីដេអូឃ្លីប ករណីនេះអាចស្ថិតនៅក្រោមមាត្រា ១៤-២ នៃច្បាប់ស្តីពីករណីពិសេសទាក់ទងនឹងការផ្តន្ទាទោសឧក្រិដ្ឋកម្មផ្លូវភេទ។
បទប្បញ្ញត្តិនេះគ្រប ដណ្តប់លើការ កែសម្រួល ការសំយោគ ឬការរៀបចំរូបភាព ឬវីដេអូនៃមុខ ឬរាងកាយរបស់មនុស្សម្នាក់ ប្រឆាំងនឹងឆន្ទៈ របស់បុគ្គលនោះ តាមរបៀបដែលអាចជំរុញចំណង់ផ្លូវភេទ ឬបង្កឲ្យមានភាព អាម៉ាស់ផ្លូវភេទ ។ ការរំលោភបំពានអាចត្រូវផ្តន្ទាទោសដាក់ពន្ធនាគាររហូតដល់ ៧ ឆ្នាំ ឬពិន័យជាប្រាក់រហូតដល់ ៥០ លានវ៉ុន (៣៦,000 ដុល្លារ)៕
