បេរូត៖ យោងតាមទីភ្នាក់ងារសារព័ត៌មានជាតិលីបង់ (NNA) បានឲ្យដឹងថា ប្រតិបត្តិការយោធាអ៊ីស្រាអែល បានបន្តនៅទូទាំងភាគខាងត្បូងប្រទេសលីបង់ នៅថ្ងៃអាទិត្យ ជាមួយនឹងការវាយប្រហារតាមអាកាស ការឈ្លានពានលើដី ការបាញ់ផ្លោងដោយកាំភ្លើងធំ និងការវាយកម្ទេច។
យន្តហោះចម្បាំងអ៊ីស្រាអែល បានវាយប្រហារតំបន់មួយរវាងទីក្រុង Zawtar al-Sharqiyah និង Mayfadoun នៅម៉ោងប្រហែល ៧យប់ ហើយក្រោយមកតំបន់មួយទៀតរវាងទីក្រុង Zawtar និង Arnoun ខណៈដែលកងកម្លាំងអ៊ីស្រាអែល បានធ្វើការផ្ទុះដ៏ធំនៅ Arnoun al-Shaqif និងនៅជាយក្រុង Yahmar al-Shaqif។
ការបន្ដប្រតិបត្ដិការយោធា របស់អីស្រាអែល ធ្វេីឡេីងក្នុងគ្រាដែលកងកម្លាំងសហរដ្ឋអាមេរិកនៅថ្ងៃអាទិត្យ បានវាយប្រហារប្រព័ន្ធបាញ់មីស៊ីល អ៊ីរ៉ង់ពីរគ្រាប់នៅលើកោះឡារ៉ាក់ ដែលជាការវាយប្រហារលើកដំបូងដែលគេស្គាល់របស់សហរដ្ឋអាមេរិកប្រឆាំងនឹងអ៊ីរ៉ង់ចាប់តាំងពីចុងខែកក្កដា។
លោក ហាកឃីន បានឧ្យដឹង នៅក្នុងសេចក្តីថ្លែងការណ៍មួយថា “កងកម្លាំងឆ្មាំបដិវត្តន៍អ៊ីស្លាម ត្រូវបានគេសង្កេតឃើញកំពុងរៀបចំបាញ់រ៉ុក្កែត ជាមួយមីនសមុទ្រចូលទៅក្នុងច្រកសមុទ្រហ័រមូស” ដោយបន្ថែមថាយោធាសហរដ្ឋអាមេរិកកំពុង “តាមដានតំបន់នោះយ៉ាងដិតដល់ ហើយនៅតែត្រៀមខ្លួនដើម្បីការពារលំហូរពាណិជ្ជកម្មដោយសេរី” តាមរយៈផ្លូវទឹកយុទ្ធសាស្ត្រ។
កោះឡារ៉ាក់ គឺជាកោះតូចមួយរបស់អ៊ីរ៉ង់ ដែលមានទីតាំងនៅឆ្នេរសមុទ្របានដារអាបាស ភាគខាងកើតនៃកោះឃ្វេស្ម និងភាគខាងត្បូងនៃកោះហ័រមូស។
កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បាននិយាយថា បុគ្គលិកយោធា និងជនស៊ីវិលជាច្រើននាក់ត្រូវបានសម្លាប់ ឬរងរបួសនៅយប់ថ្ងៃអាទិត្យនៅក្នុងការវាយប្រហារលើកោះឡារ៉ាក់។
នៅក្នុងសេចក្តីថ្លែងការណ៍មួយដែលបានចេញផ្សាយដោយសារព័ត៌មានផ្លូវការរបស់ខ្លួនគឺ Sepah News កងកម្លាំង IRGC បានសន្យាថាការវាយប្រហារនេះនឹងត្រូវប្រឈមមុខនឹងការដាក់ទណ្ឌកម្មចំពោះអ្នកឈ្លានពាន។
កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានឧ្យដឹងថា ខ្លួនបានបើកការវាយប្រហាររួមគ្នាដោយមីស៊ីល និងយន្តហោះគ្មានមនុស្សបើកលើមូលដ្ឋាន ទ័ពអាកាសអាមេរិក នៅហ្ស៊កដានី ដើម្បីសងសឹក ចំពោះការវាយប្រហារតាមអាកាសរបស់សហរដ្ឋអាមេរិក-អ៊ីស្រាអែល លើកោះឡារ៉ាក់ របស់អ៊ីរ៉ង់ កាលពីយប់ថ្ងៃអាទិត្យ។
យោធាអ៊ីរ៉ង់ បានកំណត់គោលដៅលើ “ហេដ្ឋារចនាសម្ព័ន្ធបច្ចេកទេស និងថែទាំ” ក៏ដូចជាតំបន់ដែល “យន្តហោះចម្បាំងសត្រូវ” ឈរជើងនៅមូលដ្ឋានទ័ពអាមេរិក King Hussein និង Al-Azraq នៅហ្ស៊កដានី ដោយបង្កការខូចខាតយ៉ាងធ្ងន់ធ្ងរ នេះបើយោងតាមរបាយការណ៍របស់ទីភ្នាក់ងារសារព័ត៌មាន Fars របស់អ៊ីរ៉ង់ ដោយដកស្រង់សេចក្តីថ្លែងការណ៍របស់ IRGC៕
ប្រែសម្រួល ឈូក បូរ៉ា
