បរទេស៖ លីគកំពូលអាល្លឺម៉ង់ Bundesliga កំពុងដើរតួនាទីយ៉ាងសកម្មក្នុង ការប្រកួតប្រជែងដណ្តើមយកចំណែកទីផ្សារ និងប្រជាប្រិយភាពនៅក្នុងសហរដ្ឋអាមេរិក ដោយប្រជែងដោយផ្ទាល់ជាមួយនឹងក្របខ័ណ្ឌ Premier League របស់អង់គ្លេស និងលីគក្នុងស្រុក MLS តាមរយៈការទាញយកប្រយោជន៍ពីសន្ទុះ នៃការប្រកួត World Cup ការចុះកិច្ចព្រមព្រៀងសិទ្ធិផ្សាយថ្មីៗ និងការប្រើប្រាស់ឥទ្ធិពលរបស់កីឡាករលំដាប់ពិភពលោក នេះបើយោងតាមការចេញផ្សាយពីសារព័ត៌មាន GOAL ថ្ងៃទី២០ ខែតុលា ឆ្នាំ២០២៦ ។
ការកសាងសហគមន៍អ្នកគាំទ្រគឺជាជំហានដំបូងដ៏សំខាន់។ ជាក់ស្តែង ក្រុម “Bayern Red Ladies” ដែលជាក្លិបអ្នកគាំទ្រជាស្ត្រីអន្តរជាតិដំបូងគេបង្អស់របស់ក្លិប Bayern Munich បានរីកចម្រើនរហូតមានសមាជិកជាង ៣០០នាក់ មកពី ៤០ប្រទេសផ្សេងៗគ្នា រួមទាំងវត្តមានយ៉ាងរឹងមាំនៅអាមេរិក។ សហគមន៍បែបនេះ បានផ្តល់ទីតាំងប្រកបដោយបរិយាបន្នសម្រាប់អ្នកគាំទ្រ ដែលជាកត្តាស្នូលក្នុងការរក្សាមូលដ្ឋានអ្នកគាំទ្រឱ្យបានយូរអង្វែង។
លោក Robin Austermann អនុប្រធានប្រតិបត្តិរបស់ Bundesliga ប្រចាំតំបន់អាមេរិក បានគូសបញ្ជាក់ថា លីគកំពុងព្យាយាមបំប្លែងចំណាប់អារម្មណ៍របស់អ្នកគាំទ្រក្រោយព្រឹត្តិការណ៍ World Cup ឱ្យក្លាយជាការតាមដានរដូវកាលលីគទាំងមូល។
ដើម្បីសម្រេចគោលដៅនេះ ភាពងាយស្រួលក្នុងការទស្សនា (Accessibility) គឺជាកត្តាស្លាប់រស់។ ការចាកចេញពីប្រព័ន្ធបង់ប្រាក់ទាំងស្រុង (Paywall) របស់ ESPN ពីមុន មកកាន់កិច្ចព្រមព្រៀងសិទ្ធិផ្សាយថ្មី បានបើកទូលាយការឈានដល់ទស្សនិកជនយ៉ាងច្រើន យល់ព្រមក្នុងទំហំទឹកប្រាក់ ១០០លានដុល្លារ សម្រាប់រយៈពេល ៥រដូវកាល ជាមួយស្ថាប័ន USA Network និង Fandango ដោយមានការប្រកួតខ្លះចាក់ផ្សាយដោយឥតគិតថ្លៃ។
ឥទ្ធិពលតារាបាល់ទាត់ Harry Kane និងកីឡាករអាមេរិក
ថ្វីដ្បិតតែមិនមែនជាការទិញយកដើម្បីតែទីផ្សារអាមេរិក ប៉ុន្តែវត្តមានរបស់ប្រធានក្រុមជម្រើសជាតិអង់គ្លេស Harry Kane នៅ Bayern Munich បានក្លាយជាមេដែកដ៏ធំមួយក្នុងការទាក់ទាញចំណាប់អារម្មណ៍ទស្សនិកជនអាមេរិកឱ្យងាកមកមើលលីគអាល្លឺម៉ង់។ ទន្ទឹមនឹងនេះ កត្តាប្រវត្តិសាស្ត្រដែល Bundesliga ជាលីគធ្លាប់មានកីឡាករអាមេរិកទៅប្រកបអាជីពច្រើនជាងគេ (ជាង ៨០នាក់) ក៏ជាស្ពានផ្សារភ្ជាប់យ៉ាងជិតស្និទ្ធរវាងលីគ និងអ្នកគាំទ្រនៅសហរដ្ឋអាមេរិកផងដែរ។
Bundesliga មិនត្រឹមតែលក់ការប្រកួតនោះទេ ប៉ុន្តែលក់នូវរឿងរ៉ាវ និងវប្បធម៌។ លីគបានប្រើប្រាស់អ្នកផលិតមាតិកា (Creators) ដើម្បីប្រាប់ពីរឿងរ៉ាវដ៏ទាក់ទាញរបស់ក្លិបមានប្រវត្តិយូរលង់ដូចជា Dortmund និង Frankfurt។ បន្ថែមពីនេះ ការរៀបចំកម្មវិធីផ្ទាល់នៅអាមេរិក ដូចជាកម្មវិធីបុណ្យស្រាបៀរ Oktoberfest របស់ Bayern Munich នៅទីក្រុងញូវយ៉ក បាននាំយកនូវវប្បធម៌ដើមពិតប្រាកដរបស់រដ្ឋបាវ៉ារៀ (Bavarian) ទៅកាន់អ្នកគាំទ្រអាមេរិកដោយផ្ទាល់ ដែលឆ្លុះបញ្ចាំងពីបរិយាកាសអ្នកគាំទ្រដ៏រស់រវើក និងមិនអាចកាត់ថ្លៃបានរបស់បាល់ទាត់អាល្លឺម៉ង់។
ជារួម តាមរយៈការរួមបញ្ចូលគ្នានូវវត្តមានកីឡាករលំដាប់ពិភពលោក យុទ្ធសាស្ត្រផ្សព្វផ្សាយបែបប្រជាសាស្រ្តច្បាស់លាស់ និងការអភិរក្សវប្បធម៌បាល់ទាត់ដ៏រស់រវើក Bundesliga កំពុងបោះជំហានយ៉ាងរឹងមាំក្នុងការកសាងទីផ្សារ និងប្រជែងយកបេះដូងអ្នកគាំទ្រនៅក្នុងសហរដ្ឋអាមេរិក៕
ប្រែសម្រួល៖ គីរី
