វ៉ាស៊ីនតោន ៖ លេខាធិការព័ត៌មាន នៃសេតវិមានអាមេរិក លោកស្រី Jen Psaki បាននិយាយកាលពីថ្ងៃសុក្រថា រដ្ឋបាលរបស់ប្រធានាធិបតី អាមេរិកលោក ចូ បៃដិន គ្រោងនឹងចាប់ផ្តើមពិនិត្យឡើងវិញ យ៉ាងហ្មត់ចត់នូវគោលនយោបាយ របស់ប្រទេសនេះ ទៅលើប្រទេសកូរ៉េខាងជើង ក្នុងការពិគ្រោះយោបល់ ជាមួយសម្ព័ន្ធមិត្ត ដូចជាប្រទេសជប៉ុនជាដើម ។
ដោយហៅសកម្មភាពមីស៊ីល នុយក្លេអ៊ែរ និងមីស៊ីលបាលីស្ទិករបស់កូរ៉េខាងជើង ជាការគំរាមកំហែង យ៉ាងធ្ងន់ធ្ងរដល់សន្តិភាព និងសន្តិសុខអន្តរជាតិ លោកស្រីបានឲ្យដឹងនៅក្នុងសន្និសីទ សារព័ត៌មានមួយថា “យើងច្បាស់ជានៅតែមានការចាប់ អារម្មណ៍យ៉ាងខ្លាំង ក្នុងការរារាំងកូរ៉េខាងជើង” ។
លោកស្រីបន្ដថា “យើងនឹងអនុម័តនូវយុទ្ធសាស្រ្តថ្មីមួយ ដើម្បីការពារប្រជាជនអាមេរិក និងសម្ព័ន្ធមិត្ត របស់យើង ឲ្យមានសុវត្ថិភាព។ វិធីសាស្រ្តនោះនឹងចាប់ផ្តើម ដោយការត្រួតពិនិត្យគោល នយោបាយយ៉ាងហ្មត់ចត់ទៅលើស្ថានភាព នៅកូរ៉េខាងជើង ដោយពិគ្រោះយោបល់យ៉ាងជិតស្និទ្ធ ជាមួយកូរ៉េខាងត្បូង ជប៉ុន និងសម្ព័ន្ធមិត្តដទៃទៀត លើជម្រើសសម្ពាធ ដែលកំពុងបន្ត និង សក្តានុពល សម្រាប់ការទូតនាពេលអនាគត ។
លោកដូណាល់ ត្រាំ ដែលជាអ្នកកាន់តំណែងមុន របស់លោក បៃដិន បានចូលរួមក្នុងកិច្ចពិភាក្សា ការទូតកំពូល ដែលមិនធ្លាប់មានពីមុនមក ជាមួយមេដឹកនាំកូរ៉េខាងជើងលោក គីម ជុងអ៊ុន ដោយបានជួបលោកចំនួន ៣ដងនៅឆ្នាំ២០១៨ និងឆ្នាំ ២០១៩ ក្នុងក្តីសង្ឃឹមបញ្ចុះបញ្ចូលប្រទេសនេះ ដើម្បីបោះបង់ចោលការស្វែង រកអាវុធនុយក្លេអ៊ែរ៕
ដោយ ឈូក បូរ៉ា
