តូក្យូ៖អ្នកគាំទ្រជាច្រើនដែលរស់នៅ ក្រៅប្រទេសជប៉ុន ដែលបានទិញសំបុត្រចូលរួម ព្រឹត្តិការណ៍ការប្រកួតកីឡាអូឡាំពិកតូក្យូ ពីឈ្មួញកណ្តាល ត្រូវបានគេស្គាល់ថា ជាអ្នកលក់សំបុត្រទទួលបានសិទ្ធិនឹងមិនទទួលបានប្រាក់ត្រឡប់មកវិញទេ ហើយពួកគេប្រហែលជាត្រូវរង់ចាំយូរដើម្បីទទួលបានប្រាក់ត្រឡប់ មកវិញយោងតាមការចេញផ្សាយ ពីគេហទំព័រជប៉ុនធូដេ។
សំណួរនៃការសងប្រាក់វិញបានកើតឡើងកាលពីមួយសប្តាហ៍មុន នៅពេលអ្នករៀបចំក្នុងស្រុក និងរដ្ឋាភិបាលជប៉ុនបានសម្រេចចិត្តមិនអនុញ្ញាតឲ្យអ្នកគាំទ្រភាគច្រើន ពីបរទេសដោយសារតែជំងឺរាតត្បាត។ មានអ្នកលក់សំបុត្រមានសិទ្ធិរាប់សិបនាក់ ជាធម្មតាពួកគេត្រូវបានតែងតាំងដោយគណៈកម្មាធិការជាតិអូឡាំពិក ហើយត្រូវបានអនុញ្ញាត ឲ្យគិតថ្លៃសេវា ២០ភាគរយលើថ្លៃសំបុត្រ។ សម្រាប់សំបុត្រតម្លៃ ២០០០ ដុល្លារឧទាហរណ៍ អ្នកលក់បន្តអាចគិតថ្លៃ ២ ៤០០ ដុល្លារ។
CoSport ជាក្រុមហ៊ុន ATR សម្រាប់សហរដ្ឋអាមេរិក និងប្រទេសដទៃទៀតបាននិយាយនៅក្នុងលិខិតមួយកាលពីចុងសប្តាហ៍ទៅកាន់អ្នកកាន់សំបុត្រថា ខ្លួននឹងមិនសងប្រាក់ថ្លៃដោះស្រាយនោះទេ ហើយវានឹងសងមកវិញនូវតម្លៃមុខនៃសំបុត្រ និងថ្លៃដឹកជញ្ជូន។
លិខិតដែលចុះហត្ថលេខាដោយប្រធាន CoSport លោក Robert F. Long បាននិយាយថា CoSport និងអង្គភាពអូឡាំពិកដទៃទៀត បានលើកទឹកចិត្តដល់រដ្ឋាភិបាល និងអ្នករៀបចំកម្មវិធីរបស់ជប៉ុនក្នុងការសងប្រាក់ទាំងអស់ ដែលចំណាយដោយអ្នកទស្សនាអន្តរជាតិ៕
