បរទេស៖ ជនជាតិកូរ៉េខាងជើងដែលស្រេកឃ្លាន បានប្រើមធ្យោបាយដោយចាប់ជំរិតកូន ៗ របស់គ្រួសារអ្នកមាន និងទាមទារប្រាក់លោះ ដើម្បីឱ្យពួកគេមានលទ្ធភាពទទួលបានចំណីអាហារ។
យោងតាមសារព័ត៌មាន Daily Mail ចេញផ្សាយនៅថ្ងៃទី២ ខែកញ្ញា ឆ្នាំ២០២១ បានឱ្យដឹងថា យ៉ាងហោចណាស់ មានការចាប់ពង្រត់កុមារចំនួន ៤ នាក់ ត្រូវបានគេរាយការណ៍នៅក្នុងប៉ុន្មានសប្តាហ៍ចុងក្រោយនេះ នៅក្នុងប្រទេសកូរ៉េខាងជើងដែលកំពុងជួបការលំបាក ក្រោមទណ្ឌកម្មអន្តរជាតិដែលដាក់លើរបបលោកប្រធានាធិបតី គីមជុងអ៊ុន។
ការខ្វះស្បៀងអាហារ ថ្នាំពេទ្យ ប្រេងឥន្ធនៈ និងរបស់របរប្រើប្រាស់ប្រចាំថ្ងៃដទៃទៀតដែលចាំបាច់ បានធ្វើឱ្យកាន់តែអាក្រក់ទៅ ៗ ចាប់តាំងពីទីក្រុងព្យុងយ៉ាង បានបិទព្រំដែនរបស់ខ្លួនទាំងស្រុង នៅខែមករាឆ្នាំ ២០២០ ក្នុងគោលបំណងការពារជំងឺកូវីដ ១៩ មិនឱ្យចូលមកក្នុងប្រទេស។
របបនេះខ្លាចប្រព័ន្ធថែទាំសុខភាពដែលមានអាយុកាលចំណាស់ និងបំពាក់មិនបានល្អរបស់ប្រទេស នឹងដួលរលំ ប្រសិនបើមេរោគឆ្លងរាលដាលក្នុងចំណោមប្រជាជន។
ជាផ្លូវការមិនមានករណីឆ្លងវីរុសកូរ៉ូណានៅក្នុងប្រទេសដែលមានព្រំប្រទល់ប្រវែង ១ ៣៥២ គីឡូម៉ែត្រជាមួយប្រទេសចិនដែលតែងតែឆ្លងកាត់ដោយអ្នករត់ពន្ធនោះទេ៕ប្រែសម្រួលៈ ណៃ តុលា
